Сураткаш Windows XP фонининг келиб чиқишини изоҳлади

Windows XP иш столининг фони сифатида машҳур бўлган «Хотиржамлик» (Bliss) тасвирининг келиб чиқишига америкалик фотограф Чарльз О'Риер изоҳ берди. Бу ҳақда Sploid хабар берди, деб ёзади Look At Me.

Сайтда кўрсатилган ва YouTube’га жойланган видеолавҳадан кўринадики, «Хотиржамлик» оддийгина фотосуратдир. О'Риер уни 1996 йили Mamiya RZ67 камераси ёрдамида туширган. Тасвирга ҳеч қандай рақамли ишлов берилмаган.

«Хотиржамлик» фотосурати дунёдаги энг кенг тарқалган тасвирлардан бирига айланди. Бундан ташқари, у Microsoft компаниясига илҳом бағишлаб, Windows XP’нинг «Ҳа, сен уддалайсан» номли реклама кампанияси яратилишига сабаб бўлган. Кампаниянинг бюджети 200 миллион долларни ташкил этган.

Windows XP операцион тизими Microsoft томонидан 2001 йилнинг 25 октябрида чиқарилган. Net Applications берган маълумотларга кўра, 2014 йилнинг январида у оммабоплик бўйича Microsoft’нинг барча операцион тизимлари орасида иккинчи ўринни эгаллайди. Windows XP Service Pack 3 техник қўллаб-қувватлашни  Microsoft 2014 йилнинг 8 апрелида тўхтатди.