Туркия бош вазири Ражаб Таййиб Эрдўғоннинг ўғли Билол Эрдўғон хайрия ташкилоти – Тургев маблағларини ўзлаштирганлиги ва талон-тарож қилганлиги гумон қилинмоқда. Бу ҳақда Мисрнинг Ahram Online нашри хабар бермоқда.
Парламентнинг сўровига бош вазир ўринбосари Булент Аринж томонидан берилган ёзма жавобда хабар қилинишича, раҳбарияти таркибига Билол Эрдўғон кирувчи Тургев жамғармаси 2008–2012 йилларда хориждан жами 99 миллион доллар миқдорида молиявий ёрдам олган. Мамлакат ичкарисидан тушган хайр-эҳсон маблағлари эса 14 миллион долларни ташкил этган, бироқ Аринж уларнинг манбасини кўрсатмаган.
Бош вазир коррупция бўйича ўзига нисбатан қўйилаётган айбловларни қатъиян рад этиб, айнан ўғлининг хатти-ҳаракатлари полицияда унга нисбатан шубҳалар уйғонишига сабаб бўлган.
Талабалар ётоқхоналари қурилиши билан шуғулланувчи Тургев ташкилотининг молиялаштирилишига қизиқиш Туркияда 2013 йилнинг декабрида юзага келган коррупция билан боғлиқ можаролар даврида пайдо бўлган. Текширувлар эса бош вазир Эрдўғоннинг сиёсатдаги ва бизнесдаги сафдошларига бориб тақалган.
Коррупцияга қарши текширувлар жорий йилнинг февраль ойида – бош вазирнинг ўз ўғли билан телефон орқали қилган суҳбати YouTube сайтига қўйилганидан кейин янада авж олди. Телефон мулоқотида Ражаб Таййиб Эрдўғон ўғлига уйида турган 30 миллион евро миқдоридаги нақд пулдан қутулишни тайинлаган. Кейинчалик мамлакат ҳукумати томонидан қалбаки, дея таъкидланган бу суҳбат 2013 йилнинг декабрида бўлиб ўтганлиги тахмин қилинмоқда.
Изоҳ (0)