Алишер Навоий номидаги Ўзбекистон Миллий боғида «Биз – буюк юрт фарзандларимиз!» шиори остида ёшлар фестивали бўлиб ўтди. Ўзбекистон мустақиллигининг 23 йиллигига бағишланган ушбу фестивал Тошкент шаҳар ҳокимлиги, «Камолот» ёшлар ижтимоий ҳаракати шаҳар кенгаши, «Ўзбекнаво» эстрада бирлашмаси ҳамкорлигида ташкил этилди, деб хабар берди ЎзА.
Фестивал доирасида мактаблар, коллеж ва лицейлар, меҳрибонлик уйларида «Ёшлар – соғлом турмуш тарзи тарафдори», «Ҳар бир инсон меҳр-эътиборда», «Оммавий маданият ва ёшлар маънавияти», «Депутат ва ёшлар», «Ҳоким ва ёшлар», «Замонамиз қаҳрамонлари» мавзусида ёзувчи ва шоирлар, кино ва театр актёрлари билан учрашувлар, китобхонликни кенг тарғиб қилишга қаратилган лойиҳалар, спорт мусобақалари ташкил этилди.
– Фестивалда тенгдошларимиз билан фаол иштирок этдик, – дейди Тошкент давлат юридик университети талабаси Дилшод Авезов. – Оммавий таҳдидлар ва ёшлар маънавияти, одам савдоси ва унинг салбий оқибатлари, ахборот хуружлари ва улардан ҳимояланишга оид долзарб мавзулардаги мулоқотлар ҳуқуқий билим ва дунёқарашимизни янада мустаҳкамлашга ёрдам бериши шубҳасиз.
Миллий боғда ёш ҳунарманд ва тадбиркорларнинг ижодий ишлари ҳамда маҳсулотлари кўргазмаси, китоблар савдоси ташкил этилди. «Ҳар бир ёшга бир ниҳол» лойиҳаси бўйича кўчат экиш акцияси ўтказилди.
Таниқли санъаткорлар ва ёш ижрочилар иштирокидаги гала-концерт барчага кўтаринки кайфият бағишлади.
Изоҳ (0)