«Ўзбектуризм» миллий компанияси томонидан 2013 йилнинг 20 декабрида эълон қилинган Қашқадарё вилоятининг сайёҳлик брендини (тимсолини) яратиш бўйича танлов муддати иккинчи марта узайтирилди. Бу ҳақда компанияси матбуот хизмати хабар берди.
Дастлаб, ушбу танловга бўлган қизиқиш ортганлиги туфайли аризалар қабули муддати жорий йилнинг 24 январига қадар узайтирилди.
«Танловга келиб тушган ишлар сонининг кўплигига қарамай, иштирокчиларнинг ишланмалари мазкур танлов ғоясини тўлиқ акс эттира олмаганлиги сабабли» танловга аризалар қабул қилиниши муддати жорий йилнинг 25 апрелига қадар узайтирилиши ҳамда ютуқ фондининг кўпайтирилиши ҳақида қарор қабул қилинди.
Танлов ғолиби ҳамда иккинчи ва учинчи ўрин соҳибларига аввалги 300 минг, 200 минг ва 100 минг сўм ўрнига энди 1 миллион, 700 минг ва 500 минг сўм ваъда қилинди.
Танловнинг асосий мақсади Қашқадарё вилояти сайёҳлик бренди бўйича креатив ғоялар ва таклифларни тўплашдан иборат.
Мазкур эркин ижодий танловда талабалар, ижодкорлар, олимлар, тарихчилар ва сайёҳлик ҳамда тарихга қизиқувчи бошқа касб вакиллари иштирок этишлари мумкин.
Изоҳ (0)