АҚШ президенти Барака Обаманинг аммаси Зайтуни Онянго 8 апрельга ўтар тунда 61 ёшида вафот этди. У Бостон шаҳридаги қариялар уйида, уйқусида жон берган, деб ёзади муассаса ходими хабарига таянган ҳолда Reuters.
Зайтуни Онянго президент отасининг туғишган синглиси эди. У Кениядан АҚШга 2000 йили кўчиб ўтган, 2002 йили эса ўз ватанидаги сиёсий вазият мураккаблиги сабабли сиёсий бошпана сўраган. Унинг сўрови рад этилса-да, аёл қочоқ мақомини олиш учун ҳаракат қилишда давом этган. 2010 йилда Бостондаги мигрантлар иши бўйича судья унинг бу борадаги талабини қондирган. Шу билан Онянго Қўшма Штатларда яшаш учун гувоҳнома ва ишлаш учун рухсатномага эга бўлган.
Қариялар уйи ходими Гордон Ландефелд сўзларига кўра, жорий йилнинг январь ойида аёлнинг саломатлиги ёмонлашган. Обаманинг аммаси Гиена-Барре синдромидан азият чеккан ва қисман фалажланган. Онянго ўз ватанида яшаган пайти дастурчи бўлиб ишлаган, АҚШга кўчиб ўтгач эса ўқитувчилик ва ҳуқуқий маслаҳатчилик қилган.
Президент аммасини яхши кўрган, ўз таржимаи ҳолини китоб қилиб ёзганида уни «Зайтуни аммажоним» деб атаган. Барак Обама ўз отасини охирги марта ўн яшарлигида кўрган, у ҳақдаги кўп маълумотларни эса аммасидан билиб олган. Шунга қарамай, Оқ уй вакилларининг гувоҳлик беришларича, Обама ўз аммасининг тақдирини ҳал этиш ишларига аралашмаган.
Изоҳ (0)