7 апрель куни Украинанинг Харьков шаҳрида намойишга чиққан халқ ўзларини «муқобил депутатлар» деб атаб, «мустақил Харьков халқ республикаси» тузилганини эълон қилишди. Бу тўғрида маҳаллий Status Quo агентлиги хабар бермоқда, деб ёзади «Интерфакс».
Ахборот агентлигининг маълумот беришича, ўнлаб россияпараст фаоллар Харьков вилояти маъмурияти биносига йиғилишган. Улар вилоят кенгаши депутатларига ишончсизлик билдириб, сўнг ўзларини «муқобил депутатлар» дея эълон қилишган.
«Маҳаллий вақт билан соат 19:00 га яқин улар ‘вилоят громадаси йиғилиши’ни ўтказишди, – дейилади хабарда. – Унда Харьков вилояти кенгаши депутатларига нисбатан ишончсизлик билдирилиб, «муқобил депутатлар» рўйхатини тузишди. Улар референдум ташкил этиш учун сессия ўтказишларини маълум қилишди».
Агентлик хабарига кўра, «муқобил депутатлар» бино олдидаги зинапояларда туриб қасамёд қилишган ва бинонинг биринчи қаватидаги вестибюлда «сессия» ўтказишган. Чунки уларнинг ичкарига киришларига милиция ходимлари йўл қўйишмаган.
Ўзларини «Харьков ҳудудий громадаси депутатлар кенгаши» деб атаб, мустақил «Харьков халқ республикаси» давлатини тузиш ҳақида қарор қабул қилишган. Бу давлат «бошқа давлатлар билан ўзаро тенг ҳуқуқли халқаро муносабатлар ўрнатиши»ни таъкидлашган. «Муқобил депутатлар» сўзларига кўра, бу қарор умумвилоят референдумида тасдиқланганидан кейин кучга киради.
Бундан ташқари, «Президент Виктор Януковичга мурожаат этиш ҳақида» ҳам қарор қабул қилинган. Мурожаатда ундан бу йиғилиш ва унинг ҳужжатлари қонунийлигини тасдиқлаши сўралиши кўзда тутилган.
Шунингдек, Харьков вилоятида референдумнинг тинч-осойишта ўтишини воситачи сифатида таъминлашни сўраб Россия Федерацияси ҳукуматига илтимос билан мурожаат этиш тўғрисида ҳам қарор қабул қилинган, дея хабар беради Status Quo.
Изоҳ (0)