Украинанинг жануби-шарқий ҳудудларида аҳолининг норозилик намойишларини куч билан бостириш учун ҳукумат қуролланган отрядларни жалб этмоқда. Россия Ташқи ишлар вазирлиги эса бу тадбирга Украина давлат идоралари қаторига кирмайдиган кучлар ҳам жалб этилганлигидан хавотир билдирди, дея хабар қилади «ИТАР-ТАСС».
«Маълумотларга кўра, Украинанинг жануби-ғарбий ҳудудларида, жумладан, Донецкда мамлакат ички қўшинлари ва миллий гвардияси бўлинмалари билан бирга, «Ўнг сектор» ноқонуний қуролланган тузилмаси вакиллари ҳам мавжуд. Уларнинг олдига мамлакат жануби-ғарбидаги аҳолининг ҳозирги Киев ҳукумати сиёсатига қарши норозилик чиқишларини куч билан бостириш вазифаси қўйилган», – дейилади Россия ТИВ баёнотида.
Москвани, айниқса, бу операцияларга АҚШнинг Greystone хусусий ҳарбий ташкилотининг 150 га яқин мутахассиси жалб этилганлиги ташвишга солмоқда. Баёнотда таъкидланишича, америкалик жангарилар «Сокол» бўлинмаси ходимлари кийимини кийиб олишган.
«Бу ишларнинг ташкилотчи ва иштирокчилари Украина тинч аҳолисининг ҳуқуқлари, эркинлиги ва ҳаётига ҳамда Украинанинг давлат барқарорлигига таҳдид солганликлари учун жавоб беришади. Фуқаролар уруши бошланишига йўл очиши мумкин бўлган ҳар қандай ҳарбий тайёргарликларни дарҳол тўхтатишга чақирамиз», – дея таъкидлайди Россия Ташқи ишлар вазирлиги.
7 апрель куни Украинанинг Донецк вилоят кенгаши депутатлари «Донецк халқ республикаси»нинг давлат мустақиллигини эълон қилган эдилар. Шу куни Харьков шаҳрида намойишга чиққан халқ ҳам ўзларини «муқобил депутатлар» деб атаб, «мустақил Харьков халқ республикаси» тузилганини эълон қилишган. Олий Рада томонидан ички ишлар вазири этиб тайинланган Арсен Аваков эса Харьков шаҳрида «аксилтеррор операция» бошланганлиги, унга мамлакатнинг бошқа ҳудудларидаги милиция бўлинмалари жалб этилганлигини баён этган.
Изоҳ (0)