Тошкентда 7 апрель — Жаҳон саломатлик кунига бағишланган анжуман ўтказилди
Тошкентда 7 апрель – Жаҳон саломатлик кунига бағишланган анжуман бўлиб ўтди. Тадбир Ўзбекистон Соғлиқни сақлаш вазирлиги ва Жаҳон Соғлиқни сақлаш ташкилотининг Ўзбекистондаги ваколатхонаси ҳамкорлигида ташкил этилди. Бу ҳақда ЎзА хабар берди.
Жаҳон Соғлиқни сақлаш ташкилоти 1948 йил 7 апрель куни ташкил топган. Ушбу сана Жаҳон саломатлик куни сифатида кенг нишонланади. Ҳар йили ушбу сана муносабати билан жамиятимиздаги бирор-бир долзарб тиббий-ижтимоий масалага эътибор қаратилади. Жорий йилда ушбу сана трансмиссив касалликларга қарши курашга бағишланди.
Трансмиссив касалликлар чивин, кана каби ҳашаротлар чақиши оқибатида юзага келади. Дунёда глобаллашув ва урбанизация жараёнлари кучаяётгани, иқлим ўзгариши туфайли келиб чиқаётган экологик муаммолар бундай касалликларнинг тарқалишига сабаб бўлмоқда.
Ўзбекистонда бундай касалликларнинг тарқалиши ва четдан кириб келишининг олдини олиш, халқимизнинг саломатлигини муҳофазалашга йўналтирилган кенг кўламли ишлар амалга оширилмоқда. Аҳолига кўрсатилаётган тиббий-профилактика ёрдамини такомиллаштириш, оилада тиббий маданиятни юксалтиришга алоҳида эътибор қаратилмоқда. Бунинг натижасида мамлакатда санитария-эпидемиология муҳитини барқарор сақлаш, трансмиссив касалликларнинг олдини олишга эришилмоқда.
