2014 йилнинг 3—5 апрель кунлари Хива шаҳридаги 12-сонли давлат ихтисослашган мактаб-интернати спорт залида 1997—1998 йилларда туғилган ўсмирлар ва қизлар ўртасида белбоғли кураш бўйича Ўзбекистон чемпионати бўлиб ўтди. Унда мамлакатнинг турли ҳудудларидан келган 230 га яқин ёш полвон иштирок этди. Уч кун давомида полвонлар белбоғли кураш ва унинг эркин тури бўйича ўзаро беллашди. Бу ҳақда «Туркистон пресс» хабар берди.
Республика ёшлар терма жамоасини шакллантиришда саралаш босқичини ўтаган мусобақада турли вазн тоифасида куч синашган ёш полвонлар — наманганлик Мурод Ҳамидов, Улуғбек Мирзаев, Ҳасанбой Давронов, Аброр Абдуллаев, Абдурашид Ғаниев, фарғоналик Баҳодир Аҳмаджонов, Жаҳонгир Қобулов, хоразмлик Оғабек Жуманазаров, бухоролик Бобур Назаров, андижонлик Муҳаммад Ашуров, тошкентлик Санжар Турсуналиевлар шоҳсупанинг юқори поғонасига кўтарилди ва Ўзбекистон чемпиони деган шарафли номга сазовор бўлди.
Қизлар ўртасидаги баҳслар ҳам қизғин ўтди. Беллашувларда Андижон вилоятидан Зулхумор Исанова, Шодия Садриддинова, Шаҳзода Эргашева, Фарғона вилоятидан Эъзозхон Исмоилова, Наманган вилоятидан Дилафрўз Мамажонова, Хоразм вилоятидан Комила Касаткина ўз вазн тоифалари бўйича ғолибликни қўлга киритди.
— Бундай нуфузли мусобақада илк бор қатнашишим, — дейди Ўзбекистон чемпиони Зулхумор Исанова. — Рақибларим жуда кучли экан, уларни енгиш осон бўлмади. Шунинг учун астойдил ҳаракат қилдим, бор маҳоратимни ишга солиб ғалабага эришдим.
Мусобақа ғолиб ва совриндорлари Ўзбекистон белбоғли кураш федерацияси ҳамда ҳомий ташкилотларнинг диплом ва қимматбаҳо совғалари билан тақдирланди.
Изоҳ (0)