Соғлом бола йилида спортчи қизларга махсус кийимлар тақдим этилади

Соғлом бола йили, деб номланган жорий йилда қизлар учун 100 минг донадан зиёд бежирим спорт кийимини тайёрлашга доир лойиҳа амалга оширилмоқда. Ўзбекистоннинг барча ҳудудларида яшаётган турли ёшдаги қизларга байрам тантаналари учун алоҳида мўлжалланган спорт кийимлари совға сифатида берилади. Бу ҳақда ЎзА хабар берди.

Лойиҳани амалга ошириш учун «Осиё рамзи» дизайнерлар ва моделерлар уюшмаси, Тошкент тўқимачилик ва енгил саноат институти, «Шарқ либослари» дизайнерлик маркази ҳамда «Ўзбекенгилсаноат» давлат акциядорлик компанияси мутахассисларидан иборат махсус ишчи гуруҳи тузилди. Шунингдек, бу жараёнга «Ўзтекс-Чирчиқ», «Контекс», «Инвесттекс», «Гул рен текс», «Арже фейшн» каби мамлакатимиздаги ихтисослаштирилган йирик тўқимачилик корхоналари ҳам жалб этилди.

«Осиё рамзи» дизайнерлар ва моделерлар уюшмаси раиси Холида Комилованинг айтишича, мутахассислар барча ёшдаги қизлар учун қарийб 50 турдаги спорт кийимлари моделини ишлаб чиққан. Миллий хусусиятлар, иқлим ва маҳаллий шароитлар инобатга олинган ҳолда 12 та модел оммавий ишлаб чиқариш учун танлаб олинди. Ушбу кийимлар таркибига синтетик тола қўшилган матолардан тайёрланмоқда. Бу, ўз навбатида, ушбу либосларнинг хусусиятларини яхшилаб, шакли ва зарур санитария-гигиена кўрсаткичларини сақлаб қолишга ёрдам беради.

Айни пайтда қизлар учун мўлжалланган бежирим спорт кийимларини ишлаб чиқаришга тайёргарлик ишлари ниҳоясига етказилди. Дизайнерлар анъанавий нақшлар ва бошқа безак элементларидан фойдаланиб, мато ва ранг уйғунлигини таъминлаган ҳолда янги либослар коллексиясида болалар ва ўсмирларнинг турмуш тарзи, дунёқараши ҳамда феъл-атворини акс эттиришга алоҳида эътибор қаратди. Болалар спортини ривожлантириш жамғармаси «Ўзтекс-Чирчиқ» қўшма корхонаси билан ана шундай спорт либосларини ишлаб чиқариш тўғрисида шартнома тузди.

«Ўзбекенгилсаноат» давлат акциядорлик компаниясининг тикувчилик-трикотаж ишлаб чиқаришни ривожлантириш бошқармаси бошлиғи Қаҳҳорбек Мўйдиновнинг таъкидлашича, бунинг учун «Ўзтекс-Чирчиқ» қўшма корхонаси танлангани бежиз эмас. Мазкур корхона юқори технологияли ишлаб чиқариш ускуналари, ўзининг физика-кимё тажриба лабораториясига эга. Бу ерда либос ишлаб чиқариш учун фойдаланиладиган барча материаллар ҳар томонлама сифат назоратидан ўтказилади.

Ушбу корхона яқин кунларда маҳсулотни Болалар спортини ривожлантириш жамғармасига етказиб беради ва янги, бежирим спорт кийимлари қизларга совға сифатида тақдим этилади.