Футбол бўйича Ўзбекистон Олимпия терма жамоаси 2014 йилги Осиё ўйинларида чемпионлик учун кураш олиб боради. Бу ҳақда ЎФФ Терма жамоалар маркази директори Асқар Толибжонов маълум қилди, дея хабар бермоқда ЎФФ матбуот хизмати.
Аввалроқ, ОАВда Қосимов 2014 йил сентябрь—октябрь ойларида Жанубий Кореянинг Инчхон шаҳрида бўлиб ўтадиган Осиё ўйинларида иштирок этувчи Ўзбекистон Олимпия терма жамоасига бош мураббий бўлгани ҳақида маълум қилинган эди.
Асқар Толибжоновнинг таъкидлашича, Инчхондаги Осиё ўйинларида 1991 ва 1992 йилларда туғилган футболчилардан иборат терма жамоа иштирок этади ҳамда жамоа олдига чемпионлик вазифаси қўйилган.
«Қосимов кузда бўладиган Осиё ўйинларида ва 2015 йил январидаги Осиё Кубогида иштирок этадиган терма жамоаларга устозлик қилади. Қосимов жамоалари Инчхондаги мусобақада 20 йил аввалги муваффақиятни такрорлаши ва Осиё Кубоги—2015 да муваффақиятли иштирок этиши керак», — дейди Толибжонов.
Толибжоновнинг қўшимча қилишича, 2014 йил январь ойида Уммонда бўлиб ўтган U-22 Осиё чемпионатида 1991, 1992 ва 1993 йилларда туғилган футболчилар билан иштирок этган Шуҳрат Мақсудов 1993 йилда таваллуд топган футболчилардан иборат терма жамоага устозлик қилади ва унинг олдига навбатдаги U-22 Осиё чемпионати финал босқичига чиқиш вазифаси қўйилган, деб ёзади «Кун».
Маълумот учун: Футбол бўйича Ўзбекистон терма жамоаси 1994 йилдан бошлаб Осиё ўйинларида иштирок этиб келади. Ҳар тўрт йилда ташкил этиладиган ўйинларда ўзбекистонлик футболчилар бир марта – илк иштирокларида (1994) ғолибликни қўлга киритган.
1998 йилги Осиё ўйинлари чорак финалида Ўзбекистон футболчилари Эронга 0:4 ҳисобида мағлуб бўлган бўлса, Пусан—2002 ўйинларида гуруҳдан чиқа олмаган. Доҳа—2006 чорак финалида Ироққа мағлуб бўлган Ўзбекистон термаси Хитойнинг Гуангчжоу шаҳрида ташкил этилган 2010 йилги баҳсларда ярим финал остонасида Жанубий Кореяга мағлуб бўлган эди.
Эслатиб ўтамиз, футбол бўйича Ўзбекистон миллий терма жамоаси бош мураббийи ҳисобланган Миржалол Қосимов «Бунёдкор» футбол клубидаги фаолиятини тўхтатгани ва энди бор эътиборини миллий терма жамоага қаратиши маълум бўлган эди.
Изоҳ (0)