АҚШнинг Калифорния штатидаги талабалар оммавий базми тартибсизлик ҳамда полициячилар ва ёшлар тўқнашуви билан ниҳоясига етди. Юзга яқин киши қамоққа олинган бўлиб, яна 44 киши жабрланди, дея хабар берди Reuters ахборот агентлиги.
15 мингдан ортиқ киши қатнашган анъанавий «Дельтопия» номли кўча базмида назорат қўлдан чиқиб кетган. Кўнгилхушлик мобайнида иштирокчилардан бири спиртли ичимлик идишларига тўла «рюкзак» билан полиция ходимига зарба берган. Шундан сўнг тадбирнинг қолган иштирокчилари тартиб ҳимоячиларига тош ва мушаклар улоқтиришни бошлаган. Натижада бир неча полиция автомобилига зарар етган.
Ҳукумат ғазабга минган оломонни тарқатиш мақсадида кўзни ёшлантирувчи газ ҳамда ўт ўчириш машиналаридан фойдаланган.
Жабрланганларнинг барчаси, жумладан, беш нафар полиция ходими яқин орадаги тиббиёт муассасасига етказилган. Уларнинг айримлари муассасани тарк этишга ҳам улгурди. Ҳозирда можаронинг қолган тафсилотлари ўрганилмоқда.
Изоҳ (0)