50 ёшли дорбоз Дени Жосслен Франция пойтахтида Сена дарёси устига 25 метр юксакликда қурилган дордан юриб ўтди. Дор иккита қурилиш крани орасига арқон тортиш йўли билан ясалган бўлиб, узунлиги 150 метрни ташкил этди, деб ёзади «ИТАР-ТАСС».
Бу Жоссленнинг Франция асосий дарёси устида иккинчи марта дор қуриб ўтиши эди. Аттракцион ҳақида аввалдан эълон берилганлиги сабабли Сена бўйида, Аустерлиц вокзали ёнида кўп сонли томошабинлар, жумладан, сайёҳлар йиғилишди.
Шамолли кун бўлишига қарамасдан, Жосслен дорда яхши ҳаракатланди ва ҳатто йўлнинг маълум бир қисмини кўзларини боғлаган ҳолда босиб ўтди. Аммо у жуда секин юриб, нариги қирғоққа салкам ярим соатда ўтди. Йўлнинг ярмига етганда, у қўлидаги лангарини дор устига хоч шаклида қўйиб, устида ётиб дам олди. Энг аҳамиятлиси – бу ҳаракатларнинг барчасини у эҳтиёт арқонисиз, яъни тросга белидан боғлаб қўйилмаган ҳолатда бажарди.
Дени Жосслен таниқли ва нуфузли артист бўлиб, Брюсселда жойлашган, Европа Иттифоқида ягона бўлган Европа дорбозлар мактабида дарс беради. Бундан ташқари, у пантомима устаси ҳам ҳисобланиб, бу соҳа бўйича 1970 йилларда шахсан Марсель Марсодан дарс олган.
Изоҳ (0)