Уганданинг ёввойи табиатни муҳофаза қилиш билан шуғулланувчи ташкилоти ходимлари томонидан вазни минг килограмм келадиган улкан тимсоҳ қўлга олинди. Жонивор тўрт нафар балиқчининг умрига зомин бўлганлиги тахмин қилинмоқда, дейилади SkyNews хабарида.
Қурбонлардан бирининг қариндошлари айтишларича, сув юзасида сузиб юрган кийим парчалари орқалигина унинг шу ерда ҳалок бўлганлигини аниқлашган. Шунингдек, яна бир қанча ҳудудларда балиқчиларга ҳамла қилган тимсоҳ ҳам шу эканлигини тахмин қилишмоқда.
Тимсоҳни овлаш учун тўрт кун вақт сарфланди. Виктория кўли соҳилига қармоқсимон улкан металл илгакка гўшт илдириб қўйишди. Жонивор хўракни ютиб, қўлга тушгач, уни кўпчилик бўлиб боғлаб, юк машинасига ортишди. Энди тимсоҳни Мерчисон Фолс миллий хиёбонига топширишади.
Мутахассисларнинг фикрича, улкан тимсоҳ камида саксон ёшда. Бундан ташқари, унинг вазни Филиппиндаги хиёбонда сақланган Лолонг лақабли тимсоҳдан 47 килограммга енгил. Гиннесснинг рекордлар китобига киритилган Лолонгнинг узунлиги олти метрдан ошар, оғирлиги эса бир тоннага яқин эди. У 50 ёшга ҳам тўлмасдан, ўтган йили ўлган эди.
Изоҳ (0)