Белоруссия Ташқи ишлар вазири Владимир Макей Москвада бўлиб ўтган МДҲ Ташқи ишлари вазирлари мажлиси олдидан Белоруссия МДҲ раислиги вазифаларини Украина ўрнига ўз зиммасига олганлигини эълон қилди. Бу ҳақда «РИА Новости» хабар берди.
Аввалроқ Киев МДҲ раислигидан бош тортганлигини расман эълон қилган эди. Украина Миллий хавфсизлик ва мудофаа кенгаши раиси Андрей Парубийнинг таъкидлашича, Украина МДҲдаги иштирокидан воз кечишга қарор қилган.
«Белоруссия МДҲ раислигини қабул қилишга тайёрлигини билдирамиз. Биз, аввало, бошлаётган фаолиятимизда Ҳамдўстлик давлатлари ўртасидаги яхши қўшничилик муносабатларини мустаҳкамлашга эътибор қаратишимиз лозим. Яна бир муҳим вазифалардан бири — МДҲ йиғилишларини ўз вақтида ва сифатли ташкил этишдан иборат», — деди Макей. Унинг таъкидлашича, иқтисодий соҳада Белоруссия асосий эътиборини 2011 йил 18 октябрда имзоланган эркин савдо ҳудуди тўғрисидаги келишув шартларини босқичма-босқич амалга оширишга қаратади.
«Иқтисодий Кенгаш билан биргаликда биз хизматларнинг эркин савдоси, давлат эҳтиёжлари учун харид қилиш ва экспорт божларини босқичма-босқич бекор қилиш каби жараёнларни назоратимизга оламиз», — деди Макей ўз нутқида.
Украинада сиёсий инқироз 2013 йилнинг ноябрь ойи охирида, яъни ҳукумат евроинтеграцияни тўхтатиб туришга қарор қилган пайтда бошланган эди. «Евромайдон» дея ном олган оммавий норозиликлар бутун Украина ҳудуди бўйича ёйилди ҳамда январь ойига келиб, ҳуқуқ-тартибот органлари билан қуролли тўқнашув содир бўлишига замин яратди.
Мухолифатчилар томонидан олов пурковчи қуроллар ва «Молотов коктейллари»дан фойдаланиб уюштирилган кўча тўқнашувларида юзлаб одамлар қурбон бўлди. 22 февралда ҳукуматда давлат тўнтариши уюштирилди. Президент Янукович ҳамда мухолиф етакчилари ўртасидаги келишувга амал қилмаган Олий Рада конституцияни ўзгартирди, парламент ва Ташқи ишлар вазирлиги таркибини алмаштирди, шунингдек, давлат раҳбарини лавозимидан четлатди. Бу эса якунда президентнинг ўз ҳаётини ўйлаб мамлакатдан қочиб кетишига олиб келди. 27 февраль куни Украина парламенти «халқ ишончи ҳукумати»ни ташкил қилди. Эслатиб ўтамиз, ушбу ҳукумат раҳбари лавозимига Арсений Яценюк тайинланган эди.
Изоҳ (0)