Mail.ru Group интернет-холдинги 4 апрель куни «ВКонтакте» акцияларининг 11,9 фоизини сотиб олди. Бу компаниянинг Лондон фонд биржасига жойлаштирилган хабарномасида маълум қилинган, деб ёзади «ИТАР-ТАСС»
«Шартнома натижаларига кўра, компания энди ижтимоий тармоқнинг 51,99 фоиз акцияси соҳиби бўлди», – дейилади пресс-релизда.
«ВКонтакте»нинг акцияларини «Мегафон» бош директори Иван Тавриндан сотиб олиш борасида Mail.ru Group 2014 йилнинг март ойида келишувга эришган эди.
2006 йили яратилган «ВКонтакте» ижтимоий тармоғи ҳозирда интернетнинг рус тилли сегментида энг оммабоп сайтлардандир. Унинг кунлик аудиторияси 50 миллион кишидан ошади. Компаниянинг энг йирик акционерлари Mail.ru Group (51,99%) ва United Capital Partners жамғармаси (48%) ҳисобланади.