2 апрель куни Россия президенти Владимир Путин «2011 йил 18-октябрдаги эркин савдо тўғрисидаги шартномани унинг томонлари ва Ўзбекистон Республикаси ўртасида қўллаш ҳақидаги баённомани ратификация қилиш тўғрисида»ги Федерал қонунни имзолади. Бу тўғрида Кремлнинг расмий сайтида маълумот берилган.
Айтиш керакки, Федерал қонун Давлат Думаси томонидан жорий йилнинг 21 мартида қабул қилинган ва Федерациялар кенгаши томонидан 26 мартда тасдиқланган.
Ўзбекистон эса бу тўғридаги баённомани 2013 йил 27 декабрь куни ратификация қилган.
Ушбу Баённома 2013 йил 31 май куни Минск шаҳрида бўлиб ўтган МДҲ давлатлари ҳукумат раҳбарлари иштирокидаги йиғилишда имзоланган эди. Унда Ўзбекистон ҳамда Эркин савдо ҳудуди тўғрисидаги Шартнома иштирокчилари ўртасидаги муносабатлар механизми баён қилинган. Хусусан, Ўзбекистон ва эркин савдо ҳудуди иштирокчилари ўртасидаги божхона тўловларини қўллаш қоидаларига аниқлик киритилган.
Изоҳ (0)