Қозоғистон Мажлиси (парламентнинг қуйи палатаси) ҳукуматнинг янги раҳбари номзодини тасдиқлади. Шу пайтгача президент маъмуриятини бошқариб келган Карим Масимов Бош вазир лавозимини эгаллади. Депутатлар уни бир овоздан қўллаб-қувватлашди, деб ёзади «Тенгринеwс» нашри.
Янги бош вазир номзодини илгари сурган мамлакат президенти Нурсултон Назарбоев аллақачон унинг лавозимга тайинланиши ҳақидаги фармонни имзолади, дея хабар беради «Новости-Казахстан» нашри. Республика раҳбари Масимовнинг аввал ҳам шу лавозимда ишлаганини эътироф этиб ўтди: «У энг қийин бўлган 2007–2009-йилларда фаолият юритди, биз орқага кетишларга, ишсизлик ошиб кетишига йўл қўймадик».
Карим Масимов ҳам, ўз навбатида, билдирилган ишонч учун миннатдорчилик ижор этди ҳамда шу пайтгача президентга кўмакчи бўлиб келганлигини ва бундан кейин ҳам шундай бўлишини таъкидлади.
Янги бош вазир Қозоқ давлат бошқарув академиясини ва Пекин тиллар институтини битказган, иқтисодиёт фанлари доктори илмий даражасига эга. Турли йилларда у банк тизимида ишлаган, Меҳнат вазирлигида бош иқтисодчи, кейин президент ёрдамчиси бўлиб ишлаган. Масимов Транспорт вазири ва иқтисодиёт вазири лавозимларида фаолият юритган. 2007–2012-йилларда Бош вазир лавозимида ишлаган, кейин эса президент маъмурияти раҳбарлигига тайинланган.
Хабарларга кўра, 2012-йилдан буён Қозоғистон Бош вазири бўлиб келаётган Серик Ахметов 2014-йил 2 апрелда истеъфога чиқди. Оммавий ахборот воситаларида бунинг мамлакатда яқинда ўтказилган девалвация билан боғлиқлигини тахмин қилишмоқда.
Изоҳ (0)