Нукусда Халқаро саноат ярмаркаси ва кооперация биржасининг ҳудудий босқичи бўлиб ўтди, деб хабар берди ЎзА.
Бугунги кунда Қорақалпоғистон Республикасида 1 минг 57 саноат корхонаси, жумладан, 24 йирик корхона, 1 минг 33 кичик тадбиркорлик субекти фаолият кўрсатмоқда. Учта корхонада импорт ўрнини босувчи маҳаллий маҳсулот ишлаб чиқариш йўлга қўйилган.
Ҳозирда Қорақалпоғистонда замонавий чангютгичлар ишлаб чиқарилмоқда. 2014-йилдан бошлаб эса энг сўнгги русумдаги телевизорлар ишлаб чиқариш йўлга қўйилади. Бу лойиҳа «Жайҳун электроникс» масъулияти чекланган жамияти томонидан амалга оширилаётир. 2014-йилда бу ерда 3Д форматдаги 300 дона телевизор ишлаб чиқариш режалаштирилган.
— Ўтган йили ярмаркада 185 корхона ва ташкилот иштирок этган ҳамда 6,9 миллиард сўмлик шартномалар тузилган бўлса, бу йил 215 корхона 1 200 дан ортиқ турдаги маҳсулотлари билан қатнашмоқда, — дейди Қорақалпоғистон Республикаси иқтисодиёт вазирлиги бўлим бошлиғи Тамара Дуйсенбина. — Шунингдек, ярмаркада бошқа вилоятлардан ҳам 16 корхона иштирок этмоқда.
— Ўзимиз ишлаб чиқараётган уй-рўзғор буюмлари, пластик ва темир жалюзалар, трикотаж маҳсулотлари, сочиқ, чойшаб каби 20 турга яқин маҳсулот билан қатнашмоқдамиз, — дейди Тошкент вилояти Зангиота туманидаги «Дур қушбеги бизнес» корхонаси раҳбари Холиёр Холназаров. — Ўйлайманки, ярмаркадан кейин харидорларимиз сафи янада кенгаяди.
Ярмаркада озиқ-овқат маҳсулотлари, тўқувчилик ҳамда тикувчилик моллари, тозалаш воситалари, чангютгич, телевизор, пластик қопламалар, қуёш энергияси ускуналари каби ўттиздан зиёд янги маҳсулотлар намойиш этилди.
Тадбир доирасида кооперация имкониятларини кенгроқ ёритиш мақсадида етакчи саноат корхоналари ўзлари ишлаб чиқараётган маҳсулотлар ва ҳамкорлик қилиш тўғрисидаги таклифлар бўйича тақдимотлар ҳам ўтказди.
Саноат ярмаркасида 9 миллиард 200 миллион сўмликдан зиёд шартномалар тузилди.
Изоҳ (0)