Россиянинг «Зарубежнефть» давлат нефтгаз компанияси Ўзбекистондаги Jizzakh Petroleum компаниясининг улушини сотиб олиш имкониятини кўриб чиқмоқда, деб хабар беради «Коммерсантъ». 2020 йилдан буён мамлакатдаги нефть конларининг катта қисми ушбу компанияга ўтказилган эди. Экспертлар Ўзбекистондаги нефть захираларини 600 миллион баррелга баҳолаган.
Нашрнинг учта манбаси «Зарубежнефть» Ўзбекистондаги Jizzakh Petroleum нефть компаниясини сотиб олишни кўриб чиқаётганини маълум қилган. Битим шартлари ҳозирча келишилмаган. Бу ҳозирда мамлакатдаги энг йирик нефть компанияси ҳисобланади — унинг таркибида 105 та кон бўлиб, қазиб олинаётган нефтнинг 70 фоизи (500 минг тоннага яқин) улар ҳисобига тўғри келади. Манбаларнинг бирининг сўзларига кўра, Jizzakh Petroleum компаниясини Россиянинг «Лукойл» компаниясига ҳам «кўрсатишган», бироқ ҳамкорлик «ўхшамаган».
Кипр реестри маълумотларига кўра, Jizzakh Petroleum Eriell нефть сервис компаниясининг асосий акциядори ва бошқарув раиси Бахтиёр Фозиловга тегишли Belvor Holding Limited томонидан бошқарилади.
Таъкидланишича, 2020 йил якуни бўйича Eriell’нинг 25 фоизи компаниянинг ягона кредитори бўлган «Газпромбанк»ка тегишли бўлган. «Зарубежнефть» компанияси битим бўйича изоҳ бермаган, бироқ «келгусида Ўзбекистонда ривожланишга» қизиқиш борлигини маълум қилган.
Jizzakh Petroleum ҳақида
Jizzakh Petroleum қўшма корхонаси 2017 йилнинг июнь ойида «Ўзбекнефтгаз» ва Gas Project Development Central Asia (Gazprom International шўъба корхонаси) томонидан ташкил этилган, деб ёзади «Gazeta.uz». Лойиҳага мувофиқ, «Ўзбекнефтгаз» компанияснинг улуши 60 фоиздан 30 фоизгача камайиб бориши ва хорижий таъсисчиларнинг улуши эса 40 фоиздан 70 фоизгача ошиб бориши керак эди.
2020 йил июнь ойига кўра таъсисчилар таркиби қуйидагича кўриниш олган эди: Кипрдаги Belvor Holding Limited (68 фоиз), «Ўзбекнефтгаз» (30 фоиз) ва Gas Project Development Central Asia (2 фоиз). 2021 йил февраль ойи бошида «Ўзбекнефтгаз» ва Belvor Holding Limited 49 фоиздан улушга эгалик қилар эди.
2021 йил май ойининг охирида «Ўзбекнефтгаз» таъсисчилар таркибидан чиқди ва эндиликда Belvor Holding Limited 98 фоиз улушларга эгалик қилади. Бундан ташқари, компаниянинг юридик номи ва мақоми ўзгарган. Эндиликда бу Саноат Энергетика гуруҳи хорижий компанияси.
ОАВлар Belvor Holding Limited компаниясининг Eriell Group нефть сервис компанияси ва Enter Engineering (Ўзбекистондаги энг йирик EPC-пудратчиларидан бири, акциядорлари орасида «Газпромбанк» бор) бошқарув раиси, тадбиркор Бахтиёр Фозилов билан боғлиқлиги борлигини айтишади.
2020 йил июнида Jizzakh Petroleum Фарғона нефтни қайта ишлаш заводини ишончли бошқарувга олган эди.
Jizzakh Petroleum сайтидаги маълумотларга кўра, компания улушига Ўзбекистонда қазиб олинадиган нефтнинг 80 фоиз ва 105 та конда аниқланган нефть захираларининг тахминан 22 фоизи тўғри келади. 2020 йилда 498,7 минг тонна нефть ва 497,4 миллион кубометр табиий газ қазиб олинган.
Маълумот учун, 2021 йил 1 январь ҳолатига кўра, Ўзбекистонда «Лукойл» компанияси 413,1 миллиард куб метр (22,1 фоиз), Uz-Kor Gas Chemical 109,6 миллиард куб метр (5,9 фоиз), Surhan Gas Chemical 106,6 миллиард куб метр (5,8 фоиз), Jizzakh Petroleum 84,9 миллиард куб метр (4,5 фоиз) газ захираларига эга конларда фаолият юритмоқда.
Мавзуга доир: Фарғона нефтни қайта ишлаш заводи яна сотувга қўйилади