Қироллик оиласининг қайси вакиллари машҳурлар билан илиқ муносабатда экани ҳақида маълумот бериб ўтамиз.
Шаҳзода Уильям
Британиянинг бўлажак тахт вориси Дэвид Бекхем билан жуда ҳам яхши муносабатда. Уларнинг дўст тутинишига футбол сабабчи бўлган. Маълумки, Уильям болалигидан ушбу спорт тури билан шуғулланади, 2006 йилда эса Британиянинг футбол ассоциациясининг президенти лавозимини эгаллаган. Бугунги кунда у Дэвид билан бирга футболни оммалаштириш мақсадида мамлакатидаги барча спорт мусобақаларига ташриф буюради. Кембриж герцоги, шунингдек, «Жоду салтанати» юлдузи Эдди Ремейн билан ҳам оғайни. Улар Этон коллежида биргаликда ўқиган. Битирганидан кейин ҳам дўстона муносабатларини сақлаб қолган.
Кейт Миддлтон
Уильямнинг Дэвид билан муносабатлари сабаб Кейт ҳам Виктория билан тез-тез кўришиб дугона бўлиб қолган. Инсайдерларнинг маълум қилишича, аёлларнинг ҳар иккисини мода ва оналик билан боғлиқ қизиқишлар бирлаштирган. Бекхемлар Лондонга кўчиб келганидан кейин эса алоқалар янада мустаҳкамланган.
Шаҳзода Гарри
Шаҳзода Гарри Меган Маркл ҳаётида пайдо бўлгунича Кара Делевин билан дўст тутинган. Улар 2015 йилда умумий дўстлари ташкил қилган зиёфатда танишган. Шунингдек, актёр Том Ҳарди ҳам шаҳзоданинг дўстлари қаторидан ўрин олган. Тўйдан кейин Меган ва Гарри Жорж ҳамда Амал Клуни билан мулоқот қила бошлаган, биргаликда кўп вақт ўтказган. Инсайдерларнинг маълумот беришича, оилалар ҳатто фарзандларини ҳам таништиришни истаган.
Меган Маркл
Меганни юлдузлар билан дўстлашиш бўйича чемпион деб аташ мумкин. У Клунилар оиласидан ташқари, Приянка Чопра, Серене Уильямс билан ҳам яхши муносабатда. Унинг танишлари сонини санаб адоғига етиб бўлмайди. Маркл тўйига таниган-танимаган бошқа юлдузларни таклиф қилгани сабаб бир неча марта танқид қилинган. Эски, оммага маълум бўлмаган дўстларини эса аллақачон унутиб улгурган.
Қиролича Рания
Иордания қироличасининг актриса Николь Кидман билан дўстлашганига бир неча йил бўлган. Улар хайрия кечасида танишган. Коридорда урилиб кетган аёллар бир зумда бир-бири билан чиқишиб кетган. Ушбу суҳбат дўстликка сабаб бўлган. Қироллик оиласига яқин манбанинг маълум қилишича, Николь ўзининг самимияти билан илк лаҳзалардаёқ Раниянинг кўнглидан жой олган.
Мавзуга доир:
- Ҳаётда бир-бири билан яқин дўст бўлган Голливуд актёрлари (фото)
- Шон-шараф хиёбонида ўз исми абадийлаштирилишини рад этган Голливуд юлдузлари (фото)
- Голливуд юлдузларининг келишган тансоқчилари (фото)
- Сталлоне, Шварсеннеггер ва 90 йиллардаги бошқа машҳур Голливуд актёрларининг соҳибжамол қизлари (фото)