7 август, шанба куни АҚШда коронавирус билан касалланиш бўйича 100 мингдан ортиқ ҳолат аниқланди, бу июнь бошидаги кўрсаткичдан 10 марта кўпроқ демакдир. Бу ҳақда Касалликлар назорати ва профилактикаси маркази (CDC) маълумотлари дарак бермоқда, деб ёзади «РБК».
Соғлиқни сақлаш тизими вакиллари хавотир билдиришича, агар аҳолининг катта қисми эмланмаса, касалхонага ётқизилганлар ва ўлимлар сони ўсишда давом этади. Аниқлик киритилишича, касалликнинг янгидан авж олиши дельта штамми билан боғлиқ.
«Бизнинг моделларимиз кўрсатишича, агар биз одамларни эмламасак, январь бошида кузатилган авж нуқтадаги каби кунига бир неча юз минггача касалланиш ҳолатларига дуч келишимиз мумкин», — деди CDC раҳбари Рошел Валенски.
Энг мураккаб вазият мамлакат жанубида қайд этилмоқда, у ерда вакцинациянинг АҚШдаги энг паст кўрсаткичлари кузатилмоқда. «Биз беморлар сонининг шунчалик кескин ўсишига гувоҳ бўляпмизки, бундай вазиятни аввал кўрмаганмиз», — деди Флоридадаги Memorial German касалхонаси бош шифокори Марк Напп.
Бир кун аввал АҚШда аҳолининг ярми коронавирусга қарши тўлиқ эмлангани хабар берилган эди. Вакцинанинг биринчи дозасини аҳолининг 58,4 фоизи (193,7 миллион киши) олган бўлса, 50 фоизи (165,9 миллион киши) иккита доза билан эмланган.
Аввалроқ АҚШ ҳукумати коронавирусга қарши тўлиқ эмланган хорижлик фуқароларгагина мамлакатга кириш учун рухсат беришни режалаштираётгани хабар берилган эди.