Миллиардер Билл Гейтснинг собиқ рафиқаси дунёнинг энг бой аёлларидан бирига айланди. Мелинда Гейтснинг бойлиги эри билан ажрашганидан кейин 5,7 миллиарддан зиёдга кўпайди, деб хабар бермоқда Bloomberg.
Уларнинг никоҳи расман бекор қилинганидан кейин Microsoft корпорацияси асосчиси Билл Гейтс собиқ хотинига умумий қиймати 2,5 миллиард долларлик акцияларини берди.
Билл Гейтснинг инвестицияларини бошқарувчи Cascade Investment фонди 5 август куни тадбиркорнинг собиқ хотини ҳисобига Американинг энг йирик автодилери — AutoNation 3,3 миллиондан ортиқ акцияларини ўтказган. Айни пайтда уларнинг қиймати, тахминан, 390 миллион долларга баҳоланмоқда. Бундан ташқари, Мелинда Гейтс John Deere корпорациясининг 2,8 миллионта, Canadian National Railway компаниясининг 9,5 миллионта акциясини қўлга киритди. Ушбу активларнинг умумий қиймати 2 миллиард доллардан ошади.
Аввалроқ Билл Гейтснинг собиқ рафиқаси Cascade Investment’нинг қарийб 3 миллиард долларлик қимматли қоғозларига эга бўлган эди. Шу тариқа унинг бойлиги бизнесмен билан ажрашганидан буён 5,7 миллиарддан зиёдга ошиб, уни дунёнинг энг бой аёлларидан бирига айлантирди.
27 йиллик турмушидан сўнг Билл ва Мелинда Гейтс май ойида ажрашаётгани ҳақида эълон қилди. Шу вақт ичида улар уч фарзандни тарбиялаган. Улар ҳаётининг янги босқичида эр-хотин сифатида ортиқ ривожлана олмаслигини айтди. Мелинда Гейтс ажрашгандан кейин фамилиясини ўзгартиришдан бош тортди.
Август бошида эса улар расман ажрашди. Суд ҳужжатларида айтилишича, Билл ва Мелинда Гейтс ажрашиш шартномасини (separation contract) тузган, ва унинг доирасида мулк, қарз ва суд харажатларини бўлишишга келишиб олган.
The Wall Street Journal хабар беришича, Мелинда Гейтс эри жинсий жиноятларда айбланган молиячи Жеффри Эпштейн билан алоқада бўлгани сабабли ажрашишга қарор қилган. Билл Гейтснинг матбуот котиби тадбиркорлар фақат хайрия ишларини муҳокама қилганини айтган.
Bloomberg маълумотларига кўра, ажрашув ҳақида эълон қилингандан сўнг Мелинда Гейтс турли компанияларнинг 3 миллиард доллардан ортиқ акцияларига эга бўлган.
Билл Гейтс — сайёрадаги энг бой одамлардан бири. Bloomberg унинг бойлигини 152 миллиард долларга, Forbes журнали эса 131,4 миллиард долларга баҳоламоқда. Ушбу нашрлар томонидан тузилган миллиардерлар рейтингида Билл Гейтс тўртинчи ўринда туради.