Жонс Ҳопкинс университети маълумотларига кўра, дунёда COVID-19’ни юқтириб олганлар сони 153 977 028 кишига етган. Касалланганлар сони бўйича АҚШ (32,5 миллион), Ҳиндистон (20,2 миллион), Бразилия (14,8 миллион), Франция (5,7 миллион) ва Туркия (4,9 миллион) энг олдинда бормоқда. Дунё бўйича ўлимлар сони эса 3 223 800 кишига етган.
Эверестдаги алпинистлар орасида коронавирус тарқалди
Эверест тоғидаги таянч лагери алпинистлари ва Непал ҳукумати маълум қилишича, COVID-19 белгилари бўлган алпинистлар сони ўсиши кузатилмоқда, бу эса пандемия авж олиши юзасидан хавотир уйғотмоқда.Таянч лагери ва бошқа лагерлардан даволаниш учун Катманду касалхонасига юборилган экпедиция иштирокчиларининг 17 нафарида вирус аниқланган.
Непал ҳукумати машҳур тоғнинг экспедициялар учун ёпиб қўйилишидан хавфсираб, шу пайтгача таянч лагерида COVID-19’га нисбатан тестлар ижобий чиққани ҳақидаги ҳар қандай маълумотларни рад этиб келаётган эди. Чет эллик алпинистлар Непал ҳукумати учун асосий даромад манбаси бўлиб ҳисобланади. Эверест ўтган йили пандемия чоғида ёпилган эди, энди эса алпинистлардан Непалга етиб келганидан кейин, таянч лагерига кетишдан аввал карантиндан ўтишни талаб қилади.
Сўнгги ҳафталар ичида Непалда коронавирус билан касалланиш ҳолатлари кескин кўпайди. У Ҳиндистон билан қўшни мамлакатлар орасида энг юқори касалланиш даражасига эга.
Британия COVID-19’га қарши вакцинанинг учинчи дозаси билан курашмоқчи
Буюк Британия ҳукумати 50 ёшдан ошган одамларга пандемияга, хусусан, янги штаммлар тарқалишига қарши самаралироқ курашиш учун коронавирусга қарши вакцинанинг учинчи дозасини олишни таклиф қилмоқчи.Айни пайтда иккита вариант: коронавирус мутацияларига қарши курашиш учун махсус ишлаб чиқилган вакциналардан фойдаланиш ёки мамлакатда ишлатилаётган вакциналарнинг учинчи дозасини жорий қилиш кўриб чиқилмоқда.
Учинчи марта эмланишни ҳукумат кексалардан ташқари, бошқа ҳамроҳ касалликлари туфайли хавф гуруҳида бўлган одамларга ҳам таклиф қилмоқчи.
Маълумотларга кўра, юқоридаги икки вариант бўйича ўтказилган илк тадқиқотлар Британия ҳукуматида мавжуда ва янги мутацияларга қарши кураш учун шулар етарли бўлиши ҳақида умид уйғотган.
АҚШда келаси ҳафта ўсмирлар учун Pfizer вакцинаси маъқулланиши мумкин
Президент Жо Байден 4 май, сешанба куни аҳолини COVID-19’га қарши иммунизация қилишнинг янги босқичи ҳақида эълон қилди, у 12—15 ёшли болаларга урғу берилишини кўзда тутади.Айни пайтда АҚШда 16 ёшгача бўлган ўсмирлар учун махсус вакцина бўлмаса-да, FDA (Озиқ-овқат маҳсулотлари ва дорилар сифатини назорат қилиш бошқармаси) келаси ҳафта ушбу ёш тоифаси учун вакцинадан фойдаланиш учун рухсатга тузатишлар киритишни маъқуллаши кутилмоқда.
Байденнинг айтишича, FDA’нинг рухсатидан кейин ҳукумат ўсмирларни эмлаш учун бутун мамлакат бўйлаб 20 мингта вакцина майдонларини зудлик билан очишга тайёр.
Шунингдек, Байден АҚШ ўз вакциналарининг бир қисмини бошқа мамлакатларга юборишини маълум қилди.
«Биз шу ойдан бошлаб июнгача COVID-19’га қарши AstraZeneca вакцинасининг 60 миллионта дозасини бошқа мамлакатларга юбориш мажбуриятини ўзимизга олдик. Бу шуни билдирадики, биз шу вақт ичида АҚШ учун тайёрланган жами вакциналарнинг 10 фоизи дунёнинг қолган қисмига юборилади», — деди Америка президенти.
АҚШда айни пайтда тахминан 10 миллион доза вакцина бор, яна 50 миллиони 2021 йилнинг май—июнида тайёр бўлади.
Шу билан бирга Байден АҚШ ўз вакцинасини айнан қайси мамлакатларга юборишига аниқлик киритмади.
Европа иттифоқида коронавирусга қарши 150 миллион киши эмланди
Евроиттифоқда 150 миллион киши COVID-19’га қарши эмланди. Вояга етган аҳолининг тўртдан бир қисми вакцинанинг биринчи дозасини олган.Еврокомиссия раҳбари сўзларига кўра, июлда аҳолининг 70 фоизини эмлаш учун етарлича вакцина бўлади.