Tesla ва SpaceX асосчиси Илон Маск АҚШнинг Техас штатида янги шаҳар яратиш режаларини эълон қилди. Бу ҳақда тадбиркор Twitter’да ёзди, деб хабар беради «РБК».
«Техасда Старбейс шаҳрини яратяпман» — дея твит қолдирган Илон Маск.
Bloomberg хабарига кўра, гап SpaceX корпорациясининг Техасдаги ракета учириш майдончаси жойлашган Бока-Чика қишлоғи номини ўзгартириш ҳақида кетмоқда. Нашрнинг ёзишича, ўтган ҳафта маҳаллий қонунларга кўра, ҳудуд номини ўзгартириш таклифини маъқуллаши керак бўлган Камерон округининг судьяси Эдди Тревино ҳали компаниядан тегишли сўровни олмаганини айтган эди.
CNBC агентлиги 2020 йилнинг декабрида Маскнинг Кремний водийсидан Техасга кўчиб ўтиши ҳақида хабар берган. Бундан олдин тадбиркор Калифорниядаги коронавирус пандемияси билан боғлиқ чекловларни танқид қилган ва у Техасда фаолиятини кучайтиришга тайёрлигини таъкидлаган. Декабрь ойининг бошида Маск Калифорниядаги мулкини сотувга қўйган. Ўшанда у «мол-мулк одамни пастга тортиши»ни айтган эди.
Бундан ташқари, 2020 йил июль ойида Tesla асосчиси Техасда электромобиллар ишлаб чиқарадиган янги завод қурилиши ҳақида эълон қилган эди. Заводда Cybertruck электр юк машиналари ва тиркамаларини ҳамда АҚШнинг шарқий қисмидаги мижозлар учун Моdel 3 ва Model Y электромобиллари йиғилиши режалаштирилган. Техас штати губернатори Грег Эбботт CNBC телеканалида Маскнинг штатда завод қуришга қарор қилганини таъкидлади, чунки бу унга ўз фаолиятини исталганча кенгайтириш эркинлигини беради.
Эслатиб ўтамиз, февраль ойи охирида Илон Маск Tesla акцияларининг нархи тушиши оқибатида бир кунда 14 миллиард доллар йўқотди.
Бу йўқотишдан кейин ҳозирда Маскнинг бойлиги 176 миллиард долларни ташкил қилмоқда. Лекин тадбиркор ҳозир ҳам дунёнинг энг бой кишилари рўйхатида иккинчи поғонани банд қилиб турибди.
Бунгача ҳам Илон Маск бир кеча кундузда 15 миллиард долларни бой берган эди. Бу йўқотишга ҳам Tesla акциялари нархининг тушиб кетиши сабаб бўлган.