Ўзбекистон Президенти Шавкат Мирзиёев 2 февраль куни Покистон бош вазирининг маслаҳатчиси Абдул Раззоқ Довудни қабул қилди. Бу ҳақда Президент матбуот хизмати хабар қилди.
Суҳбат чоғида Ўзбекистон ва Покистон ўртасидаги ўзаро манфаатли ҳамкорликни ривожлантириш истиқболлари юзасидан фикр алмашилди.
Давлат раҳбари икки мамлакатнинг амалий ҳамкорлигини изчил кенгайтиришга хизмат қилаётган фаол мулоқотлар ва алмашинувлар пандемияга қарамасдан, давом эттирилаётганини таъкидлади. Таъкидланишича, товар айирбошлаш ҳажми ортиб, етакчи компанияларнинг қўшма кооперация лойиҳалари сони кўпайиб бормоқда.
Абдул Раззоқ Довуд Ўзбекистон Президентига учрашув ташкил этилгани учун самимий миннатдорлик билдирди ҳамда Покистон бош вазири Имрон Хоннинг саломи ва энг эзгу тилакларини етказди.
Маслаҳатчи Афғонистон ҳудуди орқали Марказий ва Жанубий Осиёни энг қисқа йўл билан боғлайдиган, Покистоннинг денгиз портларига чиқишни ва уларнинг инфратузилмаси самарали ишга солинишини таъминлайдиган темир йўл қуриш лойиҳасини илгари суриш тўғрисидаги ташаббус Покистонда юксак баҳоланиб, қўллаб-қувватланаётганини қайд этди.
Икки томонлама иқтисодий муносабатларнинг бошқа долзарб масалалари ҳам кўриб чиқилди.
Автомобиль ва ҳаво транспортида юк ташишларни ривожлантириш имкониятларини кўриб чиқиш, преференсиал савдо тўғрисидаги битимни тайёрлаш, божхона иши соҳасида тажриба алмашиш, ишбилармонлар ўртасидаги мулоқотни фаоллаштириш ва ишбилармонлик тадбирларини ўтказиш юзасидан келишувларга эришилди.
Олий ва юқори даражадаги бўлажак учрашув ва мулоқотлар режаси келишиб олинди.
Аввалроқ Шавкат Мирзиёев Афғонистон президенти администрацияси раҳбари ҳамда мамлакат ташқи ишлар вазирини, Саудия Арабистони делегациясини қабул қилгани ҳамда Жанубий Корея президенти Мун Чже Ин билан видеоанжуман шаклида учрашув ўтказгани ҳақида хабар берилганди.