Ўзбекистонда ишлаш учун аккредитация берилмаган ва Ташқи ишлар вазирлиги ходими унга шилқимлик қилганини таъкидлаган полшалик журналист Агнешка Пикулиска ҳақида хабар берилган эди. ТИВ матбуот хизмати ушбу масала юзасидан муносабат билдирди.
Қайд этилишича, 2 февраль куни Ташқи ишлар вазирлигида вазирлик Матбуот котиби А.Ходжиметов ва илгари ТИВ ҳузурида Al-Jazeera телеканали мухбири сифатида аккредитациядан ўтган Агнешка Пикулицка ўртасида учрашув бўлиб ўтди.
Учрашув давомида унинг аккредитацияси ва бўлиб ўтган воқеа билан боғлиқ қўшимча ҳолатлар аниқланди. Чет эллик журналистдан ҳодиса учун узр сўралди.
Мазкур мухбир томонидан тилга олинган вазирлик ходими эса Ташқи ишлар вазирлиги тизимидан бўшатилди.
Агнешка Пикулицканинг журналистик аккредитациясини расмийлаштириш жараёни 2021 йил 3 февраль куни якунланади.
Эслатиб ўтамиз, Агнешка Пикулиска-Вилчевска — Тошкентда фаолият юритувчи мустақил журналист. У The Diplomat, Guardian, Al Jazeera, Eurasianet ва бошқа кўплаб инглиз ҳамда поляк тилларидаги халқаро нашрлар учун мақолалар ёзади. У Аёл журналистлар Коалициясининг аъзоси. Бундан ташқари, у Тошкентдаги Вебстер университетида ҳам дарс берган.
1 февраль куни у Ўзбекистон Ташқи ишлар вазирлиги унга аккредитация беришни рад этганини ўзининг Twitter’ида маълум қилган. Унинг айтишича, бунга сабаб «унинг аккредитация қилинган ОАВдан бошқа ОАВ учун ҳам ишлаши бўлган». ТИВ аккредитация бўйича жавобни қонун бўйича 2 ойда эмас, балки 6 ойда берган.
Журналист 2020 йил аккредитация олганидан сўнг Ташқи ишлар вазирлигидан бириктирилган «Рустам» исмли ходим унга тегажоғлик қилиб, уни ўпмоқчи бўлганлигини айтган. У рад жавобини олгач ҳам, удан учрашишни сўраб ёзаверган. Бундан ташқари, ТИВ ходими «салбий янгиликлар кўпайиб кетган»и сабабли ундан карантин ҳақида ижобий мақола ёзишни сўраган.
Кейин журналист унинг устидан шикоят ёзишини атган. Шундан сўнг ТИВ ходими Telegram’даги ёзишмаларни ўчирган. Шикоят бўйича эса Агнешка Пикулискага ҳеч ким жавоб қайтармаган.
Олий Мажлис Сенати раиси Танзила Норбоева ушбу ҳолатга муносабат билдириб, ушбу ҳодиса пухта ўрганилиб, таҳлил қилиниши, тегишли чоралар кўрилиб, айбдорлар жазоланишини маълум қилганди. Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов ҳам бунга муносабат билдириб, бу шикояти жуда жиддий хавотир уйғотганини айтди.
2 февраль куни Агнешка Пикулиска вазирлик вакиллари билан учрашган, аммо унга тегажоғлик қилган Рустам исмли кишини бир неча марта ТИВ биносида кўрган бўлса ҳам, вазирликда уни ҳеч ким танимаганди.