Италияда коронавирусга қарши эмлаш режаси таҳдид остида: мамлакатда вакцина таъминоти билан боғлиқ жиддий муаммолар мавжуд. Бу ҳақда COVID-19 бўйича фавқулодда вазиятлар комиссари Доменико Аркури маълум қилди, деб хабар қилди «Lenta.ru».
Унга кўра, мамлакатда етказиб берилган вакциналар сони илгари режалаштирилганидан 60 фоизга кам.
«Биз эмлаш режасини Италияга 28,6 миллион дозали вакцинани етказиб беришни ўз ичига олган схема бўйича бошлаган эдик. Энди биз 11,2 миллион дозани етказиб берадиган схема бўйича ишлаяпмиз», – дея тушунтирди Аркури.
Маълумот учун, январь ойининг сўнгги ҳафталарида Американинг Pfizer компанияси Италияга вакцина етказиб беришни аввалига 29 фоизга, кейин эса 20 фоизга қисқартирди. Мамлакатда AstraZeneca вакцинаси билан ҳам муаммолар бўлган. Унга кўра ушбу вакцина 55 ёшдан катталар учун тавсия қилинмайди.
Сўнгги ҳафталарда Европа Иттифоқи коронавирусга қарши вакциналарни етказиб беришда бир қатор муаммоларга дуч келди. 15 январь куни Pfizer фармацевтика компанияси ишлаб чиқаришни модернизация қилиш туфайли Европа мамлакатларига вакцина етказиб беришни қисқартириш тўғрисида қарор қабул қилганлигини эълон қилди.
Кейин 23 январь куни Bild газетаси AstraZeneca ўз вакцинасининг кутилган миқдордаги дозасини Европа мамлакатларига етказиб бера олмаслигини хабар қилди. Таъминот узилишининг сабабларидан бири сифатида Ҳиндистоннинг Пуне шаҳрида қурилаётган вакцина заводида ёнғин чиққани кўрсатилган.
Жумладан, Венгрия Европа Иттифоқи дастури бўйича вакцина жуда секин келаётганидан шикоят қилган. Таъкидланишича мамлакатга ҳафтада 100 минг дозадан ҳам кам вакцина олиб келинмоқда. Шунинг учун Венгрия қўшимча равишда Россия ва Хитой вакциналарини сотиб олиш бўйича музокаралар ўтказган.
Бундан ташқари, Германия соғлиқни сақлаш вазири Йенс Шпан COVID-19 коронавирусига қарши вакцина етишмаслиги сабабли мамлакат қийин даврга дуч келиши ҳақида айтди.
Еврокомиссиянинг соғлиқни сақлаш бўйича аъзоси Стелла Кириакидис AstraZeneca компаниясига COVID-19 вакцинасини етказиб бериш жараёнига ўзгартириш киритгани учун аниқлик киритишни сўраб хат юборди. Таъкидланишича, компания Европа Иттифоқига дастлаб келишилганидан анча кам дозаларни юборган.
Унинг сўзларига кўра, илгари Европа Иттифоқи ушбу компания вакцинани яратиши ва уни ишлаб чиқаришини молиялаштириб, уларни тез етказиб бериш учун олдиндан буюртмалар берган. Энди расмий Брюссель «шартноманинг тўлиқ бажарилишини» хоҳламоқда.
Европа Иттифоқи илгари имзоланган келишувга мувофиқ, 2021 йилнинг биринчи чорагида 100 миллион дозада вакцина олиши керак. Аммо Иттифоқ ишлаб чиқариш масалалари сабабли буюртмани ярмини олади, деган қўрқув бор.
Изоҳ (0)