Тошкент шаҳрида намунавий дизайн асосида автобус оралиқ бекатларини ташкил этиш борасидаги ягона концепция пойтахт Транспорт бошқармаси томонидан ишлаб чиқилмоқда. Бу ҳақда идора раҳбари Анвар Жўраевга таяниб, «Gazeta.uz» хабар берди.
Автобус бекатларини янги типдаги лойиҳа асосида яратиш Тошкент ҳокимининг қарори бўйича амалга оширилмоқда. Ҳужжат муҳокамаси ўтган йили якунланган, бироқ ҳалигача қабул қилингани йўқ.
Транспорт бошқармасининг маълум қилишича, Паркент ва Махтумқули кўчаларидаги «Механика заводи» ҳамда Аҳмад Дониш ва Амир Темур шоҳкўчасидаги «Юнусобод бозори» бекатларига лойиҳа доирасида илк конструкциялар ўрнатилган.
Бекатларга конструкциядан ташқари, банкоматлар, вендинг аппаратлари, бепул Wi-Fi, маршрутлар ва автобуснинг етиб келиш вақти бўйича электрон табло, шунингдек, кузатув камералари, урналар ва мобил қурилмаларни қувватлантиргичлар ўрнатилиши керак. Бундан ташқари, бекатлар ногиронлиги бўлган шахслар учун пандуслар билан жиҳозланиши лозим.
Транспорт бошқармаси раҳбари мавжуд бекатларнинг асосий муаммосини санаб ўтган. Унинг сўзларига кўра, бекатларнинг аксарияти дўконларга айланиб кетган. Бекат қачонки дўкон ишга тушганда очилиши йўловчиларга ноқулайлик тугдъирмоқда. Автобус бекатларидаги дўкон ёпилгач эса улар тўхтамай қўяди ва жамоат транспорти шахсий автомобиль ҳайдовчилари учун мўлжалланган йўлакни эгаллаб ола бошлайди.
Ҳоким қарорининг лойиҳасига кўра, автобус бекатларига ягона лойиҳага мос келмайдиган конструкциялар ўрнатилса, ерни ижарага бериш ҳуқуқи бекор қилинади. Бундан ташқари, автобус бекатининг ер участкаси давлат ва жамоат эҳтиёжлари учун олиб қўйилиши мумкин. Бу ҳолда ижарага олувчи камида 30 кун олдин ёзма равишда огоҳлантирилиши керак.
Автобус бекатларининг дизайни Ўз Дст 3196:2017 давлат стандартига мос равишда танлов натижалари асосида сараланган. Жўраевнинг сўзларига кўра, лойиҳани амалга ошириш муддати Транспорт бошқармаси томонидан бекатларнинг ташқи кўриниши «Ўзстандарт» агентлиги, Архитектура ва капитал қурилиш бошқармаси, шунингдек, Йўл ҳаркати хавфсизлиги бошқармаси томонидан маъқулланганидан кейин эълон қилинади.