Ўзбекистон Ахборот ва оммавий коммуникациялар агентлиги 2020 йилнинг 9 ойи давомида теле ва радиоканалларга, босма ва интернет нашрларига 90 та тақдимнома ва огоҳлантириш юборган. Бу ҳақда агентлик томонидан маълум қилинди.
«Ҳар қандай жамиятда очиқлик ва сўз эркинлигини таъминлаш жараёнида муаммолар бўлиши табиий. Жаҳон амалиётида бирор-бир ахборот воситаси қонунбузарлик содир этса, унинг фаолиятини судга ошириш, турли жарималар ва ҳаттоки фаолиятини тўхтатиб туришгача бўлган чоралар қўлланиши кузатилади. Бугунги шароитда АОКА эндигина оёққа тураётган мустақил ОАВни ҳар жиҳатдан қўллаб-қувватлаш мақсадида улар йўл қўйган қонунбузарлик ҳолатлари юзасидан расмий огоҳлантириш билан чекланмоқда ва ўз ваколатидаги бошқа чораларни ҳозирча қўлламай келмоқда», — дейилади агентлик баёнотида.
АОКА томонидан таъкидланишича, расмий мақомга эга бўлган 1777 та ахборот субъектига нисбатан бирдек ёндашилмоқда.
Баёнотда маълум қилинишича, 2020 йилнинг ўтган 9 ойида жами 90 та — шундан телевидение ва радиога 39 та, жумладан, Ўзбекистон миллий телерадиокомпанияси тизимидаги телеканаллар фаолиятига оид 20 га яқин, «ЗўрТВ» телеканалига 7 та, «Севимли» телеканалига 5 та, даврий босма нашрларга 29 та, жумладан, «Ишонч» газетасига 1 та, «Сўғдиёна» газетасига 1 та, «Бекажон плюс» газетасига 1 та, «Театр» журналига 1 та, интернет нашрларига 22 та, жумладан, «Effect.uz» сайтига 3 та, «Nova24.uz», «Qalampir.uz» ва «Repost.uz» сайтларига 2 тадан тақдимномалар киритилган.
Агентлик баёнотига кўра, 2019 йилда жами 150 та — шундан теле ва радиоканалларга 75 та, даврий босма нашрларга 65 та, интернет сайтларга 10 та тақдимнома ва огоҳлантириш юборилган.
Агентлик, шунингдек, шу кунгача бирорта ҳам ОАВ маъмурий, молиявий ёки жиноий жазога тортилмагани, бироқ бундан хулоса чиқарилмаса, қонунчиликда белгиланган жазо чоралари қўлланиши мумкинлиги ҳақида огоҳлантирди.
АОКАнинг маълум қилишича, агентлик ҳуқуқлари бузилган журналистларни ҳимоя қилиш масаласига ҳам эътибор қаратмоқда. 2020 йилнинг ўзида ўн нафарга яқин журналист ва блогерга нисбатан қаршилик кўрсатиш, ахборот тарқатганлик учун асоссиз сўроққа тутиш каби ҳолатлар юзасидан Қорақалпоғистон Республикаси Вазирлар Кенгаши, Ўзбекистон Республикаси Бош прокуратураси, Ички ишлар вазирлиги, Олий суд ва Фарғона вилояти ҳокимлигига журналистик фаолиятга тўсқинлик қилишни зудлик билан тўхтатиш, айбдорларни белгиланган тартибда жазолаш, бундай ҳолатлар такрорланишига бошқа йўл қўймаслик тўғрисида ёзма талабнома ва мурожаатлар юборилган.
Аввалроқ Ўзбекистонда ОАВ ходимлари, журналистлар медиа-маконда ўз ҳақ-ҳуқуқлари, баҳсли ҳодисалар бўйича фикрлари билан бўлишиб, шу фикрлар юзасидан малакали юристлар, адвокатлар хулосасини олиб боришлари учун янги платформа яратилиши ҳақида хабар берилганди.