ЖССТ дунёнинг турли давлатларида COVID-19 билан касалланиш бўйича дастлабки ҳолат декабрь ойидаёқ бошланган бўлиши мумкинлигини билдирди. «ТАСС»нинг хабар беришича, бу ҳақда ташкилотнинг расмий вакили Кристиан Линдмайер 5 май куни ўтказилган брифингда маълум қилди.
У Франция касалхонасига 27 декабрь куни даволанишга келган бемор таҳлилида коронавирус топилганлиги ҳақидаги хабарларга муносабат билдирган. Шу кунгача Францияда касалликка чалиниш бўйича дастлабки ҳолат январь охирларида қайд этилган, деб ҳисобланган.
Кристиан Линдмайер бу маълумотни қизиқ деб баҳолаган, лекин бунинг ҳайрон қоларли жойи йўқлигини таъкидлаган. «Коронавирус бўйича илк ҳолат декабрь ойи бошларида қайд этилган эди. Касалланган одамлар бу пайтда Ухандан бошқа давлатларга саёҳат қилган бўлиши мумкин»,— деб бу ҳолатга изоҳ берган ЖССТ вакили.
Эслатиб ўтамиз, COVID-19 коронавирус инфекцияси дастлаб Хитойнинг Ухань шаҳрида қайд этилганди. Жорий йилнинг 11 март куни Жаҳон соғлиқни сақлаш ташкилоти коронавирусни пандемия деб эълон қилганди.
Айни пайтда дунё бўйлаб коронавирусга чалинганлар сони 3,5 миллион кишидан, қурбонлар сони эса 250 минг кишидан ошиб кетди.