Туркиядаги барча асосий саноат корхоналари 11 май кунидан бошлаб ўз фаолиятини қайта йўлга қўяди. Бу ҳақда мамлакатнинг саноат ва технологиялар вазири Мустафо Варанкка таяниб, «РИА Новости» хабар берди.
Туркия президенти Ражаб Тоййип Эрдўғон мамлакатни коронавирус пандемиясидан сўнг босқичма-босқич одатдаги ҳаёт тарзига ўтказиш тўғрисидаги режа билан бўлишган эди. Туркия соғлиқни сақлаш вазири Фаҳриддин Кожанинг 4 май куни маълум қилишича, мамлакатда коронавирусга чалинганлар сони ўтган бир сутка ичида 1614 кишига кўпайган — бу ой давомида кузатилган энг паст кўрсаткич бўлиб, бутун мамлакат бўйлаб касалликка чалинганлар сони 127 минг кишидан ошган.
«Асосий корхоналар 11 майдан яна иш бошлайди», — дейди Варанк.
Унинг қўшимча қилишича, мамлакатда 16,9 минг компания апрель ойида эълон қилинган комендатлик соатига қарамай ўз фаолиятини давом эттирган.
Эслатиб ўтамиз, Президент Шавкат Мирзиёев 20 апрель куни бўлиб ўтган йиғилишда коронавирус аниқланмаган ҳудудларда карантин чекловларини босқичма-босқич юмшатиш юзасидан топшириқ берган эди. Президент томонидан 22 апрель куни ўтказилган видеоселекторда Ўзбекистоннинг коронавирус қайд этилмаган ҳудудларида саноат корхоналари ва кластерлар ўз ишини қайта бошлагани маълум қилинди. 24 апрель куни ўтказилган йиғилишда эса Фарғона ва Қашқадарёдаги коронавирус хавфи паст бўлган ҳудудларда карантин чоралари босқичма-босқич юмшатилиши айтилганди. 29 апрель куни эса карантин сабабли фаолияти тўхтаган 10 мингга яқин корхонанинг ишини қайта тиклаш бўйича қарор қабул қилинди.