Тошкентда актрисани қасддан ўлдириб, жасадини каналга оқизиб юборган қотилларга қамоқ жазоси тайинланди. «Бир жиноят изидан» кўрсатувининг навбатдаги сонида ушбу ваҳшиёна қотиллик тафсилотлари маълум қилинди, дея хабар бермоқда UZ24 нашри.
Фуқаро Нодира Аҳмадқулова 2018 йилнинг 6 январь куни Юнусобод туман ИИБга ариза билан мурожаат қилиб, жияни — қатор сериаллар ва клипларда турли ролларни ижро этган актриса Нилуфар Султонова 2 январь куни соат тахминан 12:00 да ўзининг Spark машинасида уйидан чиқиб кетиб, бедарак йўқолганини маълум қилган. Текширув-суриштирув ишлари давомида Нилуфар сўнгги бор Пўлатжон Турғунбоев билан учрашгани аниқланган.
Маълум бўлишича, Пўлат 2 январь куни соат тахминан 16:00 атрофида Нилуфар билан учрашади. Унга дўсти Бобур Умаровни Ғазалкентдаги уйига олиб бориб келиши кераклигини айтиб, Нилуфарни ҳам ўзи билан олиб кетади. Улар Пўлатнинг Epica машинасида йўлга чиқади. Маълум фурсат йўл босилгач, Пўлат машинани «Тошкент—Ғазалкент» йўлининг овлоқроқ бир жойида тўхтатади. Орқа ўриндиқда ўтирган Бобур Нилуфарнинг бўйнига сиртмоқ солмоқчи бўлганида, қиз буни сезиб қолиб, машинадан тушиб қочишга уринади.
Қизни яна зўрлаб машинага ўтказишади — қаршилик қилган Нилуфарнинг ўнг қўл билак соҳасига пичоқ уришади. «Нилуфар ошиқ йигити Пўлатга илтижоли боқиб, ундан ёрдам сўрайди. Ўзини ҳеч нарсадан хабари йўқдай кўрсатган йигит қизни шифохонага олиб боришга ваъда беради. Қон йўқотиш натижасида ҳолсизланиб бораётган Нилуфарнинг бўйнига орқа ўриндиқда ўтирган Бобур яна сиртмоқ солади. Ожиз қолган қиз унга қаршилик қилолмай қолади. Ошиғи Пўлат эса унинг қўлини ушлаб туради», — дейилади хабарда.
Сўнгра икки жиноий шерик мурдани машинанинг юкхонасига солиб, Нилуфарнинг Spark машинаси қолдирилган жойга қайтиб келади. Мурдани Epica’дан олиб, Spark’нинг юкхонасига солишади. Сўнг Spark’ни Пўлатнинг уйига ҳайдаб кетишади. Ўша куни соат 23:30 атрофида Нилуфарнинг мурдаси, жиноят вақтида ишлатилган пичоқ, арқон ва бошқа ашёвий далиллар билан бирга Тошкент вилоятидан оқиб ўтувчи Дамариқ каналига оқизиб юборилади. Нилуфарнинг мурдаси 12 январь куни Дамариқнинг Тошкент вилояти Тошкент тумани Кўксарой ҳудудидан оқиб ўтган қисмидан топилган.
Жиноят ишлари бўйича Тошкент вилояти суди ҳукми билан Пўлатжон Турғунбоев Жиноят кодексининг 97-моддаси («қасддан одам ўлдириш») 2-қисми «в», «и», «б» бандлари билан 19 йил муддатга, 164-модда («босқинчилик») 3-қисми «г» банди билан 14 йил муддатга, 227-моддаси («ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш») 2-қисми «а» банди билан 2 йил муддатга ҳамда 59-модда («бир неча жиноят содир этганлик учун жазо тайинлаш») билан 20 йил муддатга озодликдан маҳрум қилинди.
Бобур Умаров эса Жиноят кодексининг 97-моддаси («қасддан одам ўлдириш») 2-қисми «в», «и», «б» бандлари билан 17 йил муддатга, 164-модда («босқинчилик») 3-қисми «г» банди билан 12 йил муддатга, 227-моддаси («ҳужжатлар, штамплар, муҳрлар, бланкаларни, автомототранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яшириш») 2-қисми «а» банди билан 2 йил муддатга ҳамда 59-модда («бир неча жиноят содир этганлик учун жазо тайинлаш») билан 18 йил муддатга озодликдан маҳрум этилган.
Изоҳ (0)