2016-yil hosilidan boshlab O‘zbekistonda ho‘l meva-sabzavot, kartoshka, poliz mahsulotlari va uzum xarid qilish bo‘yicha davlat buyurtmasi joriy etiladi. Bu O‘zbekiston Respublikasi Prezidenti Islom Karimov 12-aprel, seshanba kuni imzolagan “Meva-sabzavot, kartoshka va poliz mahsulotlarini xarid qilish va ulardan foydalanish tizimini takomillashtirish chora-tadbirlari to‘g‘risida”gi qarorda ko‘zda tutilgan, deya xabar bermoqda “Gazeta.uz”.
Davlat buyurtmasi “O‘zbekoziqovqatxolding” kompaniyasi tarkibiga kiradigan qayta ishlash korxonalarini xomashyo bilan ta’minlash, ichki iste’mol bozorini qish—bahor mavsumida barqaror ta’minlash maqsadida zaxiraga g‘amlash, meva-sabzavot mahsulotlarini eksport qilishga talabdan kelib chiqqan holda shakllantiriladi. Yangi mahsulotni keyinchalik qayta ishlash uchun xarid qilish “O‘zbekoziqovqatxolding”, qish—bahor mavsumiga mahsulot g‘amlash “O‘zbekozikovqatzaxira” assotsiatsiyasi, eksport esa “O‘zagroeksport” kompaniyasi tomonidan amalga oshiriladi.
Davlat buyurtmasi doirasida mahsulotlarni qayta ishlash uchun xarid qilish fermer va dehqon xo‘jaliklari hamda “O‘zbekoziqovqatxolding” tarkibiga kiradigan xususiy mulk shaklidagi qayta ishlash korxonalari o‘rtasida tuziladigan kontraktatsiya shartnomalari asosida shartnoma qiymatining 40 foizidan kam bo‘lmagan miqdorda bo‘nak berish orqali amalga oshiriladi. Ho‘l meva-sabzavot, kartoshka, poliz mahsulotlari va uzum fermer va dehqon xo‘jaliklaridan kelishilgan, bozor narxlarida xarid qilinadi.
Yangi va qayta ishlangan mahsulotlar “O‘zagroeksport” ixtisoslashtirilgan tashqi savdo kompaniyasi tomonidan xorijiy sheriklar bilan to‘g‘ridan-to‘g‘ri tuzilgan eksport shartnomalari, shuningdek, fermer va dehqon xo‘jaliklari, agrofirmalar va qayta ishlash korxonalari o‘rtasida tuziladigan komissiya shartnomalari asosida eksport qilinadi.
Iyun oyida Toshkentda 2016-yilgi ho‘l meva va qayta ishlangan meva-sabzavot mahsulotlarini eksport qilish bo‘yicha shartnomalar tuzish uchun Xalqaro meva-sabzavot mahsulotlari yarmarkasi o‘tkazilishi ko‘zda tutilgan. Bunday yarmarkalarni o‘tkazish bo‘yicha doimiy faoliyat ko‘rsatadigan maydon tashkil etilib, uning bazasida har yili oktabrda kelgusi yil uchun eksport shartnomalari tuzishni tashkil qilish maqsadida xorijiy kompaniyalarning faol ishtirokida xalqaro yarmarkalar o‘tkaziladi.
Prezident qarori bilan meva-sabzavot, kartoshka, poliz mahsulotlari va uzumni qayta ishlaydigan xususiy mulk shaklidagi korxonalar, idoraviy mansubligidan qat’i nazar, 2019-yilning 1-yanvarigacha zamonaviy uskuna va texnologiyalar olib kirishda bojxona to‘lovlaridan (bojxona yig‘imlaridan tashqari) ozod etildi. Xuddi shu sanagacha “O‘zbekoziqovqatxolding” tarkibiga kiradigan qayta ishlash korxonalari daromad solig‘i, yuridik shaxslar mulk solig‘i, mikrofirma va kichik korxonalar uchun yagona soliq, davlat maqsadli fondlariga majburiy ajratmalar (yagona ijtimoiy to‘lovdan tashqari) to‘lashdan ozod etildi.
Izoh (0)