O‘zbekiston Respublikasi Prezidenti Islom Karimov Oliy Majlis Qonunchilik palatasi tomonidan 10-mart kuni qabul qilingan va Senat tomonidan 31-mart kuni ma’qullangan “Parlament nazorati to‘g‘risida”gi qonunni imzoladi. Qonun 12-apreldan kuchga kiradi. Bu haqda “Gazeta.uz” xabar bermoqda.
Qonunga ko‘ra, davlat boshqaruvi idoralari va mansabdor shaxslarning Konstitutsiya hamda qonunlar, parlament palatalari qarorlari, davlat dasturlarining bajarilishi, shuningdek, o‘zlariga yuklatilgan vazifalarni amalga oshirishi parlament nazorati obyekti hisoblanadi.
Parlament palatalari, ularning qo‘mita va komissiyalari, siyosiy partiyalar fraksiyalari, Qonunchilik palatasi deputatlik guruhlari va deputatlari, Senat a’zolari, Oliy Majlisning inson huquqlari bo‘yicha vakili (ombudsman) parlament nazoratini amalga oshirishi mumkin. Qonunda prokuratura idoralari faoliyati ustidan parlament nazoratini yuritish uchun Senatning maxsus komissiyasi tuzilishi alohida belgilab qo‘yilgan. Parlament yuqori palatasining oxirgi yig‘ilishida ushbu komissiya tarkibi shakllantirildi.
Prezident ko‘rib chiqishi uchun hukumat a’zolari iste’fosi yuzasidan takliflar berish, davlat organlariga ularning faoliyati samaradorligini oshirish, mansabdor shaxslarni javobgalikka tortish yoki lavozimidan ozod etish yuzasidan taklif va tavsiyalar taqdim etish, davlat idoralari va mansabdor shaxslarga fuqarolarning huquq va manfaatlari, qonunchilikning boshqa buzilish holatlariga barham berishning talab etilishi parlament nazorati natijalari bo‘lishi mumkin.
Qonunda Oliy Majlis palatalarining parlament nazorati natijalarini ko‘rib chiqish yuzasidan yig‘ilishlari ochiq va oshkora o‘tkazilishi hamda OAV va parlament palatalari saytlarida yoritilishi ko‘zda tutilgan. Zarurat tug‘ilganda bunday yig‘ilishlarni yopiq holda o‘tkazish to‘g‘risida qaror qabul qilinishi mumkin.
Izoh (0)