FlyDubai aviakompaniyasiga tegishli “Boing”ning Rostov-Donda halokatga uchrashi arafasida havo kemasi uchuvchilari o‘rtasida ixtilof kelib chiqqan. Bu haqda “Kommersant” nashriga asoslanib, Meduza xabar bermoqda.
“Qora quti”lardan olingan ma’lumotlarga qaraganda, uchuvchilar qo‘lda boshqarish rejimida samolyotni uchinchi aylana bo‘yicha olib o‘ta boshlagan, bunda ularning uchish-qo‘nish tasmasiga yetishiga 6 kilometr qolgan. Bunday manyovr odatda avtomatik rejimda amalga oshiriladi, bunda bort kompyuteri rullarning turishini sekin-asta o‘zgartiradi. Qo‘l boshqaruvi rejimida esa uchuvchilar buni unutib, rullarni keskin tezlik to‘plash rejimiga qo‘ygan bo‘lishi mumkin.
Aytilishicha, uchuvchilar tajribasizligi tufayli yoki charchoqdan samolyot keskin ko‘tarilayotganini payqamagan bo‘lishi mumkin. Samolyot tezligi tusha boshlaganida esa ular orasida ixtilof kelib chiqqan. Ulardan biri tezlikni oshirib, dvigatellarni yerdan ko‘tarilish rejimiga moslashtirmoqchi bo‘lgan, ikkinchi uchuvchi esa sherigiga baqira ketgan.
Uchuvchilar samolyotga bo‘lgan bosim ortayotganini tushunganida qanday harakat qilish borasida kelishib olgan, lekin ular kech qolgan — samolyot qulayotgan edi.
Eslatib o‘tamiz, 19-mart kuni FlyDubai aviakompaniyasiga tegishli Boeing 737-800 layneri Rossiyaning Rostov-Don shahri aeroportiga qo‘nish vaqtida halokatga uchradi. Hodisa oqibatida samolyot bortida bo‘lgan barcha yo‘lovchilar va ekipaj a’zolari halok bo‘lgan.
Izoh (0)