7-mart, dushanba kuni Tatariston poytaxti Qozondagi Xalqlar do‘stligi uyida “O‘zbekiston go‘zali” chiroy va iste’dod tanlovining final bosqichi bo‘lib o‘tdi. Tanlov Gran-prisi sohibasi “Jahon durdonasi” VI xalqaro talabalar festivalida o‘z mamlakati nomidan ishtirok etish huquqiga ega bo‘ldi, deb xabar beradi “Tatar-Inform”.
Tanlov Tatariston Respublikasi o‘zbeklari milliy-madaniy muxtoriyati hamda “O‘zbekiston Respublikasi yoshlari” mintaqaviy jamoat tashkiloti tomonidan o‘tkazildi.
Tanlov uch bosqichdagi sinovlardan iborat bo‘ldi. Birinchi bosqichda ishtirokchilar o‘zlari haqida gapirib berdi. Ikkinchi bosqich qatnashchilarning ijodiy taqdimotlaridan iborat bo‘ldi. Nihoyat, uchinchi sinovda qizlar o‘z iste’dodini namoyish etib berdi, ya’ni kimdir raqsga tushdi, kimdir qo‘shiq kuyladi, yana kimdir taomlar pishirdi, she’rlar o‘qidi.
Hakamlar hay’ati natijalarni hisob-kitob qilguniga qadar qo‘shiqchi Sardorbek Ataniyazov chiqish qildi.
“O‘zbekiston go‘zali” va “Tomoshabinlar simpatiyasi sohibasi” unvoniga Qozon Federal universitetining 19 yoshli talabasi Sabina Musayeva sazovor bo‘ldi.
Boshqa natijalar:
“Miss maftunkorlik” — Malika Eshmuradova;
“Miss iste’dod” — Go‘zal Madaminova;
“Miss tabassum” — Lola Malyukova;
“Miss intellekt” — Dinara Rahmonqulova;
“Miss tavoze” — Sitora Ahmedova;
“Miss mukammallik” — Oysha Imomqulova;
“Miss latofat” — Shahnoza Eshpo‘latova.
Izoh (0)