Moskvadagi Narodnoye Opolcheniye ko‘chasidagi xonadonda 29-fevral kuni yong‘in yuz berdi; inshootdan qizning boshsiz tanasi topildi. Qotillikda gumon qilinuvchi — bolaning enagasi keyinroq “Oktyabrskoye pole” metro bekati oldida qo‘lga olindi: ayol qizchaning boshini ko‘tarib olganicha, o‘zini terrorchi deb atayotgan edi. Meduza nashri mazkur hodisa bilan bog‘liq barcha ma’lum tafsilotlarni bir sahifaga jamladi.
Qotillikda gumonlanuvchi — 39 yoshli enaga. U O‘zbekistonda tug‘ilgan, ismi Gulchehra Boboqulova. Halok bo‘lgan qizcha esa taxminan to‘rt yoshda bo‘lgan. Boboqulova bu qizga bir yarim yilcha enagalik qilgan, oilaning unga nisbatan hech qanday e’tirozi bo‘lmagan. 29-fevral kuni taxminan soat sakkizda ota-ona ishga ketgan, ko‘p o‘tmay katta o‘g‘il o‘qishga yo‘l olgan. “Moskovskiy komsomolets” nashri ma’lumotlariga ko‘ra, qotillik va xonadonning yoqib yuborilishi Moskva vaqti bilan 9:40 da yuz bergan.
Qo‘lga olingan ayol o‘zini portlatib yuborish bilan tahdid qilgan. Ma’lumotlarga ko‘ra, ayol ko‘chada bolaning boshini ko‘tarib olgan holda ancha vaqt davomida yurgan va, guvohlarning videoyozuvlariga asoslaniladigan bo‘lsa, o‘zining terrorchi ekani, o‘zini portlatmoqchiligi haqida baqirib aytgan. Ayol qora libosda bo‘lgan, uning yuzi, fotosuratlarga asoslaniladigan bo‘lsa, mato bilan yashiringan edi. Qo‘lga olishganidan so‘ng, uning tanasidan portlovchi uskuna topilmagan.
So‘roq vaqtida ayol o‘zi amalga oshirgan qotillikni erining xiyonati bilan izohlagan. “Interfaks” agentligining huquqni muhofaza qilish organlaridagi manbasi ma’lumotga ko‘ra, jinoyatga qo‘l urgan vaqtda Boboqulova psixotrop moddalar ta’siri ostida bo‘lgan. Qo‘lga olingan ayol sud-tibbiy ekspertizasidan o‘tkaziladi.
Politsiya sustkashlikda ayblanmoqda. Guvohlarning so‘zlariga ko‘ra, politsiyachilar bu ayolni darhol qo‘lga olmagan; hodisa joyidan ko‘plab videolar, turli rakurslardan olingan va huquqni muhofaza qilish organlari ma’lum vaqt davomida hech qanday faol harakatga kirishmaganini ko‘rish mumkin. Roliklarning birida formasi politsiyachinikiga o‘xshash kishi ayolning yonidan yugurib o‘tayotgani, uni to‘xtatishga, qo‘lga olishga urinmayotganini ko‘rish mumkin.
Rossiyaning bolalar huquqlari bo‘yicha vakili Pavel Astaxov hushyor turgani uchun politsiyachilarni maqtadi. U enagalarni yollashda ruhshunos va narkologdan ma’lumotnoma talab qilishni tavsiya etdi.
Izoh (0)