Futzal bo‘yicha Toshkentda o‘tkazilayotgan Osiyo chempionatining birinchi yarim final o‘yini yakuniga yetdi. Unda O‘zbekiston va Tailand terma jamoalari o‘zaro maydonga tushdi.
Uchrashuvning 23-daqiqasida O‘zbekiston terma jamoasi futbolchisi Dilshod Rahmatov hisobni ochdi. Ammo oradan bir daqiqa o‘tgach tailandlik Jetsada Chudech oradagi muvozanatni tikladi. Asosiy vaqt tugaguncha hisob o‘zgarmadi va hakam 5 daqiqadan ikkita qo‘shimcha vaqt belgiladi.
Qo‘shimcha vaqtning birinchi daqiqasidayoq tailandliklar oldinga chiqib oldi. Ammo 48-daqiqada Artur Yunusov hisobni tenglashtirdi va o‘yin 2:2 hisobida yakunlandi.
Penaltilar seriyasida omad O‘zbekistonga kulib boqdi. Penaltilar seriyasida Feruz Faxriddinov, Dilshod Irsaliyev va Konstantin Sviridov o‘z zarbalarini aniq bajardi. Tailandliklarning ikkinchi zarbasini esa O‘zbekiston darvozaboni qaytardi.
Shu tariqa, O‘zbekiston o‘z tarixida to‘rtinchi marta Osiyo chempionati finaliga chiqdi. Ammo o‘tgan safarlarda O‘zbekiston faqat kumush medal bilan kifoyalangan. Bu safar O‘zbekiston termasiga finalda omad tilab qolamiz.
O‘zbekistonning finaldagi raqibi 19:00 da boshlanadigan Eron — Vyetnam o‘yinidan keyin ma’lum bo‘ladi.
Futzal. OCh—2016. Yarim final
O‘zbekiston — Tailand — 2:2 (asosiy vaqt: 1:1, penaltilar bo‘yicha: 3:1)Gollar: Dilshod Rahmatov (23), Artur Yunusov (48) — Jetsada Chudech (24), Apivat Chayemchareon (41).
Izoh (0)