KXDR o‘tgan hafta uchirganligi ma’lum qilingan sun’iy yo‘ldosh Yer orbitasidan signal uzatmayapti, shunga qaramasdan uning uchirilishi Shimoliy Koreyaning katta yutug‘i hisoblanadi. Bu haqda AQSh armiyasi raketa mudofaasi qo‘mondonligi rahbari general-leytenant Devid Menn bergan bayonotga tayanib, “RIA Novosti” xabar beradi.
“Men sun’iy yo‘ldosh signal uzatayapti deb o‘ylamayman. Biroq hodisa KXDRning raketa texnologiyasi darajasini yaxshilashga qodir ekanligini ifodalaydi. Orbitaga nima uchirishingizdan qat’i nazar bu ahamiyatga molik hodisadir”, — dedi general Menn.
Uning so‘zlariga qaraganda, KXDRning qit’alararo ballistik raketa imkoniyatlari tashvishlanishga sabab bo‘ladi.
Eslatib o‘tamiz, 7-fevral kuni KXDR “Kvanmyonson-4” sun’iy yo‘ldoshi bo‘lgan tashuvchi raketa muvaffaqiyatli uchirilganligini ma’lum qilgan edi.
Izoh (0)