AQSh Mudofaa vazirligi Shimoliy Koreya haqiqatan ham Yer yaqinidagi orbitaga sun’iy yo‘ldosh yoki boshqa qurilmani uchirganligini tasdiqladi. Bu haqda harbiy boshqarma rasmiy vakili Piter Kukning ma’lumotiga tayanib, Reuters agentligi xabar beradi.
U KXDRning ushbu harakatini qoraladi va uni “provokatsion” deb atadi hamda dunyoning bir qator davlatlarining yuz bergan hodisaga nisbatan salbiy munosabatini eslatib o‘tdi.
Shuningdek, Kuk AQSh Janubiy Koreya bilan uning hududida raketaga qarshi mudofaaning ilg‘or tizimini kengaytirish haqidagi rasmiy muzokaralarni boshlashini tasdiqladi. Bunda Pxenyan tomonidan oshib borayotgan tahdidga qarshi turish maqsadi ko‘zlangan. So‘z eng yangi THAAD (Terminal High Altitude Area Defense System) kompleksi haqida bormoqda.
Eslatib o‘tamiz, Shimoliy Koreya 7-fevral, yakshanbaga o‘tar kechasi uzoq masofaga parvoz qiluvchi raketani uchirganligi haqida ma’lum qilingan edi. Pxenyanning o‘zi esa “Kvanmyoson-4” sun’iy yo‘ldoshi bo‘lgan raketa qurilmani orbitaga olib chiqqanini ma’lum qildi.
Izoh (0)