Futbol bo‘yicha O‘zbekiston olimpiya terma jamoasi 19-yanvar, seshanba kuni U-23 Osiyo chempionatidagi so‘nggi uchrashuvini o‘tkazdi. “C” guruhi 3-tur bahslari davomida Samvel Babayan shogirdlari Yamanga qarshi bahs olib borib, 3:1 hisobida g‘alaba qozondi.
O‘zbekiston terma jamoasiga g‘alaba keltirgan gollar Javohir Sohibov (18-daqiqa), Igor Sergeyev (68-daqiqa) va Jaloliddin Masharipov (90+3) hisobiga yozildi. Musobaqani O‘zbekiston kabi guruh bosqichidayoq yakunlagan Yaman termasi uchrashuvning 82-daqiqasida U-23 Osiyo chempionatidagi yagona golini urdi.
Eslatib o‘tamiz, guruh bosqichining dastlabki ikki uchrashuvida O‘zbekiston olimpiya terma jamoasi Janubiy Koreya (1:2) va Iroq (2:3) terma jamoalariga imkoniyatni boy berib, 2016-yil yozida Braziliyaning Rio-de-Janeyro Olimpiadasi yo‘llanmasi uchun kurashdan chiqqandi.
Izoh (0)