Qatarda boshlangan Osiyo chempionatining 1-turida O‘zbekiston olimpiya termasi Janubiy Koreyaga 1:2 hisobida imkoniyatni boy berib qo‘ydi. O‘zbekiston olimpiyachilarida pley-off bosqichiga chiqish imkoniyati qanday ekanligini baholash uchun “Stadion.uz” saytida keltirilgan musobaqa reglamentining umumiy qoidalari bilan tanishtirib o‘tamiz.
1. Musobaqada 16 ta jamoa 4 ta guruhga bo‘lingan holda ishtirok etadi. Guruh bosqichi o‘yinlari 90 daqiqadan iborat bo‘ladi. G‘alaba uchun 3 ochko, durang uchun 1 ochko beriladi. Mag‘lubiyat uchun ochko berilmaydi. Guruhdagi o‘rinlar ochkolar soniga qarab aniqlanadi.
2. Guruh bosqichida ikki yoki undan ko‘p jamoaning ochkolari teng kelib qolganda o‘rinlar quyidagicha aniqlanadi:A) O‘zaro o‘yinlarda ko‘p ochko jamg‘argan jamoa;B) O‘zaro o‘yinlarda yaxshi to‘plar farqiga ega bo‘lgan jamoa (3 yoki 4 ta jamoaning ochkolari teng bo‘lib qolganda);C) O‘zaro o‘yinlarda ko‘p gol urgan jamoa (3 yoki 4 ta jamoaning ochkolari teng bo‘lib qolganda);D) Ushbu tamoyillardan keyin ham 2 jamoaning o‘zaro natijalari teng bo‘lsa, yuqoridagi tamoyillar faqat shu jamoalarga tatbiq qilinadi;E) Guruhdagi barcha o‘yinlarda yaxshi to‘plar farqiga ega bo‘lgan jamoa;F) Guruhdagi barcha o‘yinlarda ko‘p gol urgan jamoa;G) Agar faqat ikki jamoaning ochkolari teng bo‘lsa va ular so‘nggi turda maydonda bo‘lsa, o‘yindan keyin penaltilar seriyasi amalga oshiriladi;H) Jamoalarning ogohlantirishlari hisob-kitob qilinadi. Kam ball jamg‘argan jamoaga ustunlik beriladi (sariq kartochka uchun — 1 ball; qizil kartochkaga aylangan ikkita sariq kartochka uchun — 3 ball; to‘g‘ridan-to‘g‘ri qizil kartochka uchun — 3 ball; sariq kartochkaga ega bo‘lgan futbolchiga to‘g‘ridan-to‘g‘ri berilgan qizil kartochka uchun — 4 ball);I) Qur’a.
3. Guruhda 1 va 2-o‘rinni egallagan jamoalar chorak finalga chiqadi, 3 va 4-o‘rinni egallagan jamoalar musobaqani tark etadi.
4. Chorak finalda g‘alaba qozongan jamoa yarim finalga chiqadi. Yarim finalda g‘alaba qozongan jamoalar finalda, yutqazgan jamoalar 3-o‘rin uchun bahsda ishtirok etadi.
Eslatib o‘tamiz, O‘zbekiston guruhdagi keyingi o‘yinlarini 16-yanvar kuni Iroqqa, 19-yanvar kuni Yamanga qarshi o‘tkazadi.
Izoh (0)