Futbol bo‘yicha O‘zbekiston olimpiya terma jamoasi Qatarda davom etayotgan U-23 Osiyo chempionatini mag‘lubiyat bilan boshladi. “Daryo” mazkur uchrashuvdan matnli onlayn-translyatsiya uyushtirdi.
Musobaqa guruh bosqichi 1-turida Janubiy Koreyaga qarshi to‘p surgan O‘zbekiston olimpiyachilari 1:2 hisobida mag‘lub bo‘ldi. Terma jamoaning yagona goli Osiyoning 2015-yildagi eng yaxshi yosh o‘yinchisi Dostonbek Hamdamov hisobiga yozildi.
Uchrashuv ikkinchi bo‘limida terma jamoa yetakchilaridan biri, yarim himoyachi Jamshid Boltaboyev qizil kartochka bilan jazolandi va maydondan chetlatildi. U Iroq terma jamoasiga qarshi kechadigan navbatdagi uchrashuvni o‘tkazib yuboradi.
Ma’lumot uchun, Iroq terma jamoasi ham musobaqadagi dastlabki uchrashuvini 13-yanvar kuni o‘tkazdi va Yamanni 2:0 hisobida mag‘lub etdi. Ayni vaqtda Iroq to‘plar nisbatiga ko‘ra “С” guruhida peshqadam bo‘lib turibdi.
Guruhdagi navbatdagi tur uchrashuvlari 16-yanvar kuni bo‘lib o‘tadi. Shu kuni Janubiy Koreya Yamanga qarshi maydonga tushsa, O‘zbekiston Iroq bilan hisob-kitob qiladi. O‘zbekiston ishtirokidagi o‘yin Toshkent vaqti bilan 21:30 da boshlanadi.
U-23 Osiyo chempionatida dastlabki uchta o‘rinni egallagan jamoalar (ikki finalchi va 3-o‘rin sohibi) 2016-yil yozida Braziliyaning Rio-de-Janeyro shahrida bo‘lib o‘tadigan Olimpiya o‘yinlari futbol musobaqasi yo‘llanmasini qo‘lga kiritadi. O‘zbekiston olimpiya termasi hech qachon Olimpiadada ishtirok etmagan.
U-23 Osiyo chempionati“C” guruhi, 1-tur uchrashuvi13-yanvar, chorshanba
JANUBIY KOREYA — O‘ZBEKISTON 2:1 (1:0)Gollar: Mun Chang Jin (20, penalti, 48) — Dostonbek Hamdamov (56).Chetlatish: Jamshid Boltaboyev (72).
Izoh (0)