Ravshan Ermatov O‘zbekiston olimpiya terma jamoasi har qanday raqibni mag‘lub eta olishiga ishonadi

O‘zbekistonlik FIFA referisi Ravshan Ermatov futbol bo‘yicha olimpiya terma jamoalari o‘rtasidagi Osiyo chempionati arafasida O‘zbekiston termasi imkoniyatlari haqida fikr bildirdi. Bu haqda RedPen xabar bermoqda.

12-yanvar kuni Qatarda U-23 Osiyo chempionati start oladi. O‘zbekiston olimpiya terma jamoasi mazkur musobaqada Janubiy Koreya, Iroq va Yaman termalari bilan bir guruhdan o‘rin olgan. Samvel Babayan shogirdlari turnirdagi birinchi uchrashuvni 13-yanvar kuni Janubiy Koreyaga qarshi o‘tkazadi.

“Futbolda har doim ham eng kuchli yoki eng tajribali jamoa g‘alaba qozonavermaydi. Tartib-intizom va jonkuyarlik futbolda juda katta ahamiyatga ega. Agar har bir vaziyatda 100 foiz kuch bilan harakat qilsangiz, maydonning har bir qarichi uchun kurash olib borsangiz, shubhasiz, sizda muvaffaqiyat uchun imkoniyat bo‘ladi”, — dedi Ermatov.

“Futbolchilarimizning ko‘zlarida olov bor. Ular bunday imkoniyat kamdan-kam bo‘lishini his qilib turibdi, chunki Olimpiada yo‘llanmasini hech kim osonlikcha berib qo‘ymaydi. Ishonamanki, ular har qanday jamoani mag‘lub eta olishadi”, — dedi taniqli hakam.

Ravshan Ermatov, shuningdek, futbol bo‘yicha O‘zbekiston milliy terma jamoasiga ham ishonishini ta’kidlab o‘tdi. “O‘zbekiston milliy terma jamoasi Rossiyada bo‘lib o‘tadigan 2018-yilgi jahon chempionati yo‘llanmasini qo‘lga kiritishiga ishonaman”, — deya qo‘shimcha qildi FIFA referisi Ravshan Ermatov.

• Ravshan Ermatov: “Real”ga ham, “Barselona”ga ham muxlislik qilmayman, faqat bir jamoa ishqiboziman