Ravshan Ermatov: “Real”ga ham, “Barselona”ga ham muxlislik qilmayman, faqat bir jamoa ishqiboziman

Taniqli FIFA referisi Ravshan Ermatov qaysi futbol jamoasiga muxlislik qilishini ma’lum qildi, deya xabar bermoqda RedPen.

“‘Qaysi jamoaga muxlislik qilasiz, ‘Real’gami, ‘Barsa’ga?’, deb tez-tez so‘rab turishadi. Men O‘zbekiston milliy terma jamoasidan boshqa hech bir jamoaga ishqibozlik qilmayman. Olimpiya termasi bo‘ladimi, yoshlar yoki o‘smirlar — farqi yo‘q, O‘zbekistonning barcha terma jamoalariga ishqibozlik qilaman”, — dedi Ravshan Ermatov.

Ermatovning so‘zlariga ko‘ra, u nafaqat futbol bo‘yicha, balki boshqa sport turlari bo‘yicha O‘zbekiston jamoalari va o‘zbekistonlik sportchilarga ham muxlislik qiladi.

“Milliy terma jamoa libosini kiyish va o‘z Vataning sha’nini himoya qilib, maydonga chiqish — katta sharaf. Musobaqalarda qatnashayotgan sportchilarimiz ularga xalq umid bilan qarab turganini yodda saqlashi va ularning ishtiroki butun bir mamlakatning kayfiyatiga ta’sir qilishini his qilishlari shart”, — deya qo‘shimcha qildi Ravshan Ermatov.