Rossiya 2016-yilda O‘zbekistondan xarid qiladigan gaz hajmi Turkmaniston o‘tgan yili yetkazib berganiga nisbatan ko‘p bo‘ladi

O‘zbekistondan 2016-yilda  xarid qilinadigan gaz Turkmanistondan 2015-yili olingan gaz hajmidan ko‘ra ko‘proq bo‘ladi. O‘tgan yil oxirida o‘zbek gazini sotib olishni ko‘paytirish bo‘yicha kelishuvga erishilgani bu boradagi muhim qaror sifatida baholanmoqda. Bu haqda Rossiyaning “Gazprom” kompaniyasidagi manba ma’lum qilgan, deya xabar beradi “TASS”.

“2016-yilda o‘zbek gazini xarid qilish hajmi Turkmaniston 2015-yilda yetkazib bergan 3,1 milliard kubdan ko‘ra anchagina ko‘p bo‘lishi kundek ravshan”, — deya ta’kidlagan manba. Ma’lumot uchun, O‘zbekiston gaz qazib oluvchi dunyodagi eng yirik davlatlar o‘nligiga kiradi (yiliga 63—65 milliard kub gaz), MDH davlatlari orasida esa uchinchi o‘rinni egallaydi.

Eslatib o‘tamiz, oldinroq “Gazprom” 2016-yilda Turkmaniston gazini xarid qilishdan bosh tortgani haqida xabar berilgandi.