Isroil Oliy sudi sobiq bosh vazir Exud Olmertning korrupsiya ishi bo‘yicha bergan apellyatsiyasini qisman qanoatlantirdi. Bu haqda “Jpost.com” nashri bergan ma’lumotlarga asosan “TASS” xabar qilmoqda.
“Exud Olmertning 2014-yildagi poraxo‘rlik ishi bo‘yicha unga qo‘yilgan ayblov xulosasiga nisbatan bergan apellyatsiya shikoyati 24-dekabr, payshanba kuni Oliy sud tomonidan qisman qanotlantirilgan bo‘lsada, u Isroil tarixida qamoqqa olingan ilk bosh vazir bo‘ladi”, ― deydi manba.
Ta’kidlanishicha, sud Olmertning 500 ming shekel (128 ming dollardan ziyodroq) miqdorida pora olganligi haqidagi ayblovni olib tashlab, 60 ming shekel (15300 dollar) miqdorida pora olganlikda aybladi.
“Natijada, Olmert boshda hukm qilingan olti yil ozodlikdan mahrum bo‘lishi o‘rniga 18 oy qamoqda o‘tirib chiqadi”, ― deya ma’lum qilindi.
Olmert belgilangan jazoni 2016-yil 15-fevraldan boshlab o‘tay boshlaydi.
Eslatib o‘tamiz, Quddus sudi Exud Olmertni boshqa bir korrupsiya ishi bo‘yicha sakkiz oyga ozodlikdan mahrum qilish jazosi hamda 25 ming dollar miqdorida jarima to‘lashni tayinlagan edi.
Izoh (0)