Alisher Navoiy nomidagi O‘zbekiston Milliy kutubxonasida 9—13-noyabr kunlari INFOLIB—2015 IV Milliy axborot-kutubxona haftaligi o‘tkaziladi. Bu haqda kutubxona rasmiy sayti xabar berdi.
Haftalik doirasida 30 dan ortiq tadbirlar — taqdimotlar, ijodiy uchrashuvlar, davra suhbatlari, ko‘rgazmalar, tanlovlar, mahorat mashg‘ulotlari va treninglar, badiiy va hujjatli filmlar namoyishlari, ekskursiyalar, lotereyalar, kasbga oid tadbirlar, jamoat, yoshlar, xalqaro va ijtimoiy tashkilotlar taqdimotlari o‘tkazilishi rejalashtirilgan.
Jumladan, 9-noyabr kuni akademik Aziz Qayumov va professor Dinara Azimovaning “Pyateritsa izumleniy” — Alisher Navoiyning “Xamsat ul-mutaxayyiriyn” asari badiiy tarjimasining taqdimoti, 10-noyabr kuni O‘zbekistondagi Italiya elchixonasi musiqa kechasi tashkil etiladi.
11-noyabr kuni O‘zbekiston xalq shoiri Xurshid Davron, 13-noyabr kuni esa O‘zbekiston xalq artisti Tesha Mo‘minov bilan “Yurak, so‘yla abadiyatdan” nomli, 12-noyabr kuni esa xalqaro musiqa tanlovlari g‘oliblari Sardor Milano va Sabina Mustayeva bilan ijodiy uchrashuvlar o‘tkazilishi rejalashtirilgan.
Mazkur tadbirlar bilan parallel ravishda O‘zbekistondagi nashriyotlarning yangi adabiyotlari yarmarkasi, Fanlar Akademiyasi Asosiy kutubxonasining ko‘rgazmasi, hujjatli va badiiy filmlar namoyishi va boshqa tadbirlar tashkil etilishi ko‘zda tutilgan. Haftalik doirasida tashkil etiladigan tadbirlarning to‘liq ro‘yxati bilan Milliy kutubxona saytida tanishish mumkin.
Izoh (0)