Volkswagen AG AQSh bo‘linmasi rahbari Maykl Xorn ekologik testlar bilan bog‘liq mojarolarda rahbariyat aybini inkor etib, butun mas’uliyatni kompaniya muhandislariga yukladi. Bu haqda The Wall Street Journal ma’lumotlariga tayanib, Interfax xabar bermoqda.
AQSh Kongressida 8-oktabr, payshanba kuni bo‘lib o‘tgan eshituvlar chog‘ida Xorn ishlab chiqaruvchi tomonidan yo‘l qo‘yilgan kamchiliklar uchun kechirim so‘radi. Uning aytishicha, dizel dvigatelli avtomobillarning ekologik me’yorlarga to‘g‘ri kelishi bo‘yicha natijalarni qalbakilashtirish ortida “ikki-uch nafar dasturiy ta’minot bilan shug‘ullanuvchi muhandis” turgan.
Xorn Volkswagen mashinalari aniqlangan kamchiliklarga qaramay xavfsiz ekanligini ta’kidlab, ularning dilerlardan qayta sotib olinishi ehtimolini inkor etdi va kompaniya asosiy e’tiborini nuqsonlarni bartaraf etishga qaratgani, shu maqsadda 2016-yildan boshlab avtomobillarni qaytarib olishni boshlashini ma’lum qildi.
Ma’lumotlarga ko‘ra, konsern “dizelli mojaro” doirasida uch nafar yetakchi mutaxassis — Audi bosh muhandisi Ulrix Xakenberg, Volkswagen brendini rivojlantirish bo‘yicha rahbar Xayns-Yakob Nyusser, shuningdek, poyga avtomobillarini ishlab chiqarish uchun javob bergan Volfgang Xatsni lavozimidan ozod etgan. Xorn uch nafar xodim ishdan bo‘shatilganini tasdiqladi, biroq ularning ism-sharifini oshkor etmadi.
Kuni-kecha Germaniya huquq-tartibot idoralari Volkswagen korxonalari va kompaniyaning bir qator xodimlari uylarida tintuvlar o‘tkazgan. Oldinroq mamlakat prokuraturasi Volkswagen’ning sobiq rahbari Martin Vinterkornga nisbatan tergov harakatlarini boshlagani to‘g‘risida xabar berilgan edi.
Izoh (0)